Borussia Dortmund chuan nipui transfer window inhawn hunah Jadon Sancho chu hralh an tum loh thu an sawi.

Jadon Sancho chu tun season chhungin Bundesliga-ah a che chhe lem lo hle a, game 25 khelhah goal 8 thun tawhin mi goal thun tur vawi 10 chu a siamsak tawh bawk a. Europe khawmualpui inelnaah pawh a che chhe vak chuang lo a, goal 1 thunin mi goal thun tur vawi khat a siamsak bawk a, Tottenham Hotspur hneh loin an kawng a tawp tawh thung a ni.

Germany lam a pan hnu hian a vul chho viau a, hei vang hian club thenkhat chuan an hmutai tan hle a. Lucien Favre chuan Dortmund-ah a chhawr thiam viau a ni chek ang a, a hmaa mi ngaihven hlawh lem lo tak kha mi mit fukna a ni chho a, heng zingah hian Manchester United chu a langsar pawl an ni.

Manchester United chuan centre-back leina tura sum an dah hran £80 million ($105 million) chu Jadon Sancho leina atan hian hman an tum niin tun hnaiah thuthang a awm a. Tlar hma lampang tihchak an duh hle a, hetiang atan hian Sancho hi an hmutai viau niin an sawi.

Hetianga thuthang a awm lai mek hian Borussia Dortmund sporting director Michael Zorc chuan Jadon Sancho chu hralh an tum loh thu a sawi a. An club chuan Sancho chu a rei thei ang ber kawl zui zel an tum thu a sawi a ni.

Michael Zorc chuan, “Jadon Sancho hi hralh kan tum lo a, hei vang hian a man zat tur pawh kan chhiar lo hrim hrim a. Tun dinhmunah chuan khawvela club lian ber pawhin lei min rawn dil ta se, hralh chhuah hi harsa kan ti khawp ang,” a ti.

“Sancho hi season tharah pawh Dortmund kawr hain khelmualah a la inkhel zel dawn a, kan club hmathlirah pawh a la tel chho zel dawn a ni,” a ti bawk.

Kum 18-a upa Jadon Sancho hi German club Dortmund hian hun rei zawk kawl an la tum hmel hle a, an club player pawimawh berte zinga mi ni chho zel turin beiseina pawh an nei sang hle.

Jadon Sancho hian Borussia Dortmund tana a season hmasa berah game 12 a khel a, tun season-ah chuan minute 1718 a khel tawh a, an club player pawimawh zingah a tel thei tan tawh a. First team regular Roman Burki, Alex Witsel, Marcos Reus leh Abdou Diallo te chauhin khelmualah Sancho ai hian hun an hmang hnem a ni.