Manika Batra chu India rama hmeichhe table tennis khel thin zingah ITTF world ranking top 50 a lang thei hmasa ber a ni.

Kum 23-a upa Manika Batra hi tun hnaia International Table Tennis Federation (ITTF) world ranking chhuak thar berah 47-na a ni a, a hma aiin hmun 4 ngawtin hma a sawn a. ITTF ranking top 50 huangah hian India hmeichhe table tennis star lang pha an la awm ngai lo a, Manika Batra hi a hmasa ber a ni.

Batra chuan Twitter-ah a lawmzia hi a tarlang nghal vat a. “India ram hmeichhe zinga top 50 a lang thei hmasa ber ka ni hi ka lawm tak tak a, a hma zawng aia hma sawn belh zel thei turin tan lak chhunzawm zel ka tum a. Min tantute leh min thlawptute zawng zawng chungah lawmthu ka sawi,” a ti.

Manika Batra thian tha G Sathiyan pawhin hma a sawn a, a hma aia hmun thumin a sang a, 28-naah a lawn chho ve bawk a. Sathiyan pawh hian social media kaltlangin lawmawm a tih thu hi a puangzar ve bawk a ni.

Veteran table tennis player Sharath Kamal chu ranking hmasa aiin hmun thumin a tlahniam ve thung a, 30-na ni thin kha 33-naah a awm tawh a. Sharath hi tun hnaia India rama chawimawina sang ber palina Padma Shri dawng tura an thlan zingah khan a tel a ni.

2018 chhung khan India mipa table tennis team te chuan kum 60 chhung zet an lo nghah tawh chu an puitlin a, Asian Games ah khan medal an la a. Sharath leh Batra te inkawp pawhin Jakarta ah khan India tan bronze medal an hlawh chhuak a ni.