World Cup lai a ni a, England an tluang zel a, an fans-te an phura ‘It’s Coming Home’ tih hi an uar hle. Enge a awmzia ti pawl pawh kan awm anga, tam tak chuan a lo chhuahna leh a awmzia pawh kan hre ngei ang. He slogan lar em em chhan hi sawi ve hrim hrim a tha a ni.

‘It’s Coming Home’ tih hi hla thu a ni a, Baddiel & Skinner leh The Lightning Seeds-te hla Three Lions ami niin Euro 96’ tan hmaa release niin a lar em em a ni. Hemi kum hian Euro hi England-a nghah a ni a, English ho hi football hmuchhuaktu an nih avangin Three Lions hlaah hian “It’s coming home” tih a ni a, a thunawnah “it’s coming home, it’s coming home, it’s coming, football’s coming home” tih a ni. ‘Football chu a hmu chhaktute hnenah a rawn haw/ kir mek e’ tihna a ni ber.

Euro 96’ hian England chuan semi-final an thlenga penalty shoot-out-ah Germany lakah an tlawm, tuna England coach Gareth Southgate pawh hi England squad-ah a tel nghe nghe.

England hi World Cup-ah kum 1966-a an champion bak an la champion ngai lova, kumin hian England chuan quarter-final an lut tawha, team tha an tla nual tawh bawk nen, fans-te an phur hle a Mizoram thlengin ‘It’s Coming Home’ kan lo ti ve ta sup sup a ni.

A hunlai chuan Three Lions (hla) hi a lar hle a, an release atanga kar khat chhungin copy 100,000 hralh chhuah a ni a, 98’ World Cup hma khan a thu ti danglamin release that a ni a, a thunawn (chorus) erawh tih danglam a nilo.

Kumin World Cup –ah Germany, Spain, Argentina leh Portugal-te an tla fel tawha, England hian tun inrinni hian quarter-final-ah Sweden an hmachhawn dawn a, World Cup trophy hi football hmu chhuaktute ramah hian a kir leh lovang tih a sawi theih loh.

Mizo-te hian English Premier League kan en nasa bera, England fans pawh kan tam hle a. Football khawvelah chuan mahni ram ang maia ngai tawk pawh kan tam hle aniang, England ram mi ni ve lem lote chuan “It’s going home” tih tur zawk ni awm takah, “it’s coming home” kan lo ti ve hial a ni.