Mizoram Football Association (MFA) hnuaia player pathum  Eric Lalsangzuala Colney, Armed Veng; Isaac Zomuanpuia, Sihphir leh Amos Lalnundanga, Chanmari-te chu India Under 16 football team-a telin Italy-ah an zin.

Mizo player pathumte hi MFA hnuaia Under 15 League-a inlan vek an ni a - Eric hi Bawngkawn FC tán a inlan a, Isaac hi Sihphir FC-ah khelin Amos hi Chanmari Under 15 team-ah a khel thung a ni.

AFC U-16 Qualifiers khel tura inbuatsaih mek India team zin chhuak hian Italy-ah hian ram dang pathum - USA, Mexico leh Slovenia-te an hmachhawn ang.

Coach Bibiano Fernandes chuan, "Kum hmasa lama kan team ang khan team ṭha tak kan din leh theih ka beisei," a ti a; Bibiano hnuaiah hian nikuma AFC U-16 Championship-ah India an khel ṭha hle a, South Korea lakah si khatin an chak lo a, he inkhelah hian chak se FIFA Under 17 World Cup khel turin an tling thei dawn a ni.

Bibiano chuan, "Team thar kan indin chho mek a, India ram hmun hrang hrangah kalin player kan zawng a, Kohlapur, Goa, Kerala, Mizoram leh Manipur-ahte kan kal a ni," a ti. Tun ṭuma an zin chhuahnaah team ṭha an hmachhawn dawn avangin an inzir belh zel tur a sawi.

India Fixtures

April 28: USA vs India

April 29: Mexico vs India

April 30: Slovenia vs India

(adsbygoogle = window.adsbygoogle || []).push({});