​Italian Open: Kyrgios a chhuak tau

17th May 2019, 03:05PM

Italian Open khelh mekah Australian tennis player Nick Kyrgioa chu a che mawi lo hle a, court chhunga mawi lo taka a chet bakah inkhelh zawh hma in court a chhuahsan tau bawk.

Kyrgios hi Norwegian player Casper Ruud nen second-round ah an inhmachhawn a, set thumna ah Kyrgios hian tawngkam mawi lo a hman avangin chair-umpire chuan game penalty a chawi tir a, hetah hian kum 24 mi Kyrgios hi a lungawi lo hle.

Kyrgios-a lungawi lo hian tui um a chhir a, a racquet a paih a, court-a thuthleng awm a vawm hnuah a ip la in court a chhuahsan zui bawka, Casper Ruud chu chaka puan a ni.

A chet dan mawi lo tak avangin Kyrgios hi euro 20,000 (pound 17,461) chawi tir a ni a, Italian Open-a a prize money dawn tur pound 29,366 chu a dawng dawn lo bawk. Italian Open-a tel avanga ranking point 45 a hlawhchhuah chu paih sak leh niin a thil tih chhiat man chu chawi tura tih a ni bawk.

Kyrgios hian social media lamah ngaihdam a dil tawh a, a chet dan chu pawi a tih thu leh a rilru sukthlekin a inkaihhruai tir mai chu a inchhir thu a sawi tawh.

Kyrgios hi a vawi khat chet mawi lohna a ni tawh lova, buaina neuh neuh a lo nei fo tawh. Kumin March thla mai pawh khan Miami Open-ah fan pakhat nen buaina an lo nei tawh nghe nghe.

Kum 2015 khan a khelhpui  Stan Wawrinka chu mawi lo taka a auh nawmnah avangin Kyrgios hi hrem a lo ni tawh a, ni 28 chu tennis khel thei lo tura hrem a nih bakah pound 16,200 chawi tur a ni bawk. Hemi tum hian Wawrinka mai ni lovin, Wawrinka-a bialnu pawh mawi lo takin a au nawmnah tel.

Heng mai ni lo pawh hi Kyrgios hian buaina a lo nei fo tawh a, kum 2016 khan Shanghai Masters-ah pawh pound 20,560 lai chawi tir a lo ni tawh a, hemi kum vek hian Steve Johnson nen an inkhelh tumin a chhuak taua, hrem zui a ni. Nikum mai pawh khan Shanghai Masters-ah bawk French umpire Damien Dumusois nen an inhnial hrep tawh a ni.

Copyright © inkhel.com 2024. All rights reserved.