Serena Williams chuan US Open third round a thleng chho a, Grand Slam title 24 lak tuma a beih lai hian Isua Krista chauh tha famkim a awm thu a sawi.

US Open second round-ah third seed Serena Williams chu Margarita Gasparyan nen an inkhel a, New York khawpuia Flushing Meadows-ah Serena hi 6-2, 6-4 in a chak a, third round hi harsa lo takin a thleng a ni.

2017 Australian Open title a lak hnuah khan Serena Williams hian Grand Slam title a la zui leh thei ta rih lo a. Melbourne Park hnuah hian major final ah vawi li chu a lut leh tawh a, a chak lo zawk a ni vek a. Tun tumah hian champion a tum hle a, Margaret Court record ding lai nihrual theih ngei a tum hle.

Wiliams chuan, “Theihtawp chhuahin ka khel a, ka tum anga chet loh ka nei zeuh zeuh a. Kan inkhelh zawhah ka tih ngai loh ang deuhin ka khelh dan ka thlir let a, ka tih fuh loh deuhte ka ngaihtuah tha leh a ni,” a ti.

“Thlamuang takin ka awm thin a, tun tumah khan ka rilru put dan a danglam angreng a, min delhtu a rit ve lek lek hman a. Khatiang a nih takah kha chuan tha famkim nih theih kha ka duh ber mai a ni,” a ti bawk.

A sawi zelnaah, “Tha famkim ka nih loh chuan duhthusam ka ni thei lo tih ka hria a, hetiang hi ka vanglaia ka inhmuh dan chu a ni deuh reng mai a. Tunah chuan rilru hahdam taka awm ka zir chho tawh a, a zawnin point 20 pawh hloh mah ila ka rilru a buai phah tawh lo ang,” a ti.

“A nihna takah chuan tha famkim nih theih kan duh a, chutiang nih theih chu chak lo an awm ka ring lo a. Duhthusam, tha famkim chu Isua Krista chiah kha a awm a, nih ve tum buai chi pawh a lo ni lem lo e,” tiin Serena chuan a sawi a ni.

Vawi 6 ngawt US Open champion lo ni tawh Serena Williams hian third round-ah chuan 2017 champion Sloane Stephens a hmachhawn leh dawn a ni.