Rap Music lama khawvela ber nia inchhal Kanye West chuan,"Music khawvelah chuan Michael Jordan leh Steph Curry ka ni. Tunlai music khawvelah chuan a ber ka ni e," tiin a sawi a nih kha.
Kanye West hian Basketballer ropui Michael Jordan leh tunlaia thiam ber nia chhal mek Stephen Curry-te chu intluk rengah a dah. Kanye West-a ang chiah hian Steph Curry hian Michael Jordan kha a tluk niin mi tam takin an ngai mek bawk. Heta tang ringawt pawh hian Basketball chanchin ngaihven lo pawhin Curry-a thiam zia chu awlsam takin an hre thei ngei ang le.
Steph Curry hian chanchin ngaihnawm deuh deuh a nei a, 2013 vel khan Sports thuam siam company lian Nike chuan sum tam tak nen Steph Curry hi dawrin sponsor an tum. Mahse indawrna hi a hlawtling lo hlauh mai. Curry leh Sports thuam siam company pakhat Under Armour an thawk dun ta zawk a.
Curry hian a pheikhawkah Bible chang tarlan a duh a, chu chu Nike lamin an phalsak loh avangin indawrna hi an hlawhchham ta nia report a ni. Tichuan Under Armour an rawn lang ve ta nghal vat a, anni erawh chuan Steph Curry-a duhthusam chu an tihhlawhtlin sak ta a, Under Armour chuan Steph Curry-a signature pheikhawk chu tichhuakin, hetah hian Philippi 4:13 "Mi tichaktuah chuan engkim ka ti thei a ni," tih Bible thu chu tarlan a ni ta a ni.
He Bible thu hi Steph Curry-a duh ber a ni a, Pheikhawk hnuai lamah "Engkim ka ti thei," tih tarlan a ni a, pheikhawk lei chhung lamah 4:13 tih tarlan a ni bawk a. Under Armour Curry-a Signature chuanna phawikhawk hi nikum chhunga mipa pheikhawk hralh kal ber pakhat America-ah chuan a ni nghe nghe a ni. Mi tam takin Curry-a signature Philippi 4:13 avangin Bible an keu phah bawk a ni.
Kum 27 mi Golden State Warriors Point Guard hi College Basketball-ah Davidson tan ropui takin a khel a, 2009 khan NCAA Division I scoring leader niin Southern Conference Player of the Year-ah thlan a ni nghe nghe. 2009 khan NBA Draft-ah Golden State Warriors chuan an thlang a, vawiin thlengin Golden State Warriors tan a la khel a ni.
NBA a luhchilh hnuah record ropui tak tak a rawn siam chhova, 2012-13 khan regular season-ah three-points 272 lai neiin, NBA record thar a rawn siam a, a teammate Klay Thompson nen 'Splash Brothers' tih hming lem an phuahsak a, khami season khan anni pahnih hian three points atanga an khung chu 484 lai a ni nghe nghe.
2014-15 season khan Curry hian ama record siam khum lehin, regular season-ah three-points 286 lai neiin, hemi kum hian 1975 hnua a vawi khat nan Curry chuan Golden State Warriors chu NBA Champion a nihpui a. 2015 NBA Most Valuable Player niin, hemi kum vek hian NBA Three-Point Contest champion a ni bawk. Basketballer ten telve an chak em emna NBA All-Star Game-ah 2014 atang khan a la inlan kim a, a points score atang ringawt hi chuan a ropui zia sawifiah a har, a khel en thin chuan tunlai Basketball khel thiam berah an ngai mek.
Three-Points chu lay up ang maiin a score thei a, khawi atang pawhin a score thei emaw tih tur a ni. NBA fans ten Michael Jordan kha an dah sang hle a, chutih laiin tunlai game hautak zet kara hetiang khawpa Curry a rawn che thei hi Michael Jordan ai pawha dah sang zawk an awm ta nawk mai. 2011 khan NBA Sportsmanship Award a dawng a, heta tang pawh hian mi tha tak a ni tih a lang chiang. (inkhel.com)
Steph Curry hi Pathian tih mi a ni a, a testimony CNS news-in a tarlan hi tarlang chhawng ila..
"Isua hnena ka nun ka hlan tum kha nimin ang maiin ka la hre chiang a ni. Naupang mai ni mah ila Isua Krista'n kan tan a nun a hlan tih fiah takin ka hria. Chuta tang chuan ka nun pum hi Isua tan ka hlan ta a ni.
"Ka nu leh pate chuan Isua ka rinnaah nasa takin min pui a, Charlotte Christian School-ah Middle School ka kal thin, hetah hian Pathian thu chu nitin zirtir kan ni thin a, ka naupan lai hun ka thlir kir chang hian Pathian awmpuina ka chan nasat zia ka hrechhuak thin a ni.
"Ka pa hnung zuia Basketball khelh ka tum em em laiin ka lehkha zir chhohna chu player tha tak nih theihna tur kawng niin mi chuan min ngaih sak lova. Mahse talent tha tak ka nei tih ka hriat avangin Pathian min kaihhruai dan chu zui tawp ka tum a ni ber mai.
"Davidson Head Coach Bob McKillop nen kan intawng nawlh mai a, Davidson-a a hmachhawpte min hrlh a, ka tum ram thleng tura min puih a duh thu min hrilh bawk a ni. Bob McKillop hi coach tha tak a nih piah lamah Pathian tih mi a ni a, chu chuan Basketball ka khelh chhohna kawngah leh Isua hnung ka zuina kawngah nasa takin min pui bawk a ni.
"Ka hma hun chu Pathian kutah ka dah tawp a, club zawm chungchang leh contract chungchang thlengin Pathian duh zawng a nih leh nih loh ka ngaichang hmasa phawt a, Pathianin enge keimahah tih a duh tihte ka ngaihtuah hmasa thin. Pathian min hruai dan hi ka hrethiam vek bik thin lova. Mahse tun hnua ka thlir kir leh chang hian Pathian min hruai zia hi ka hre chiang a ni.
"Pathian chuan a hmel phochhuah nan hmun sang zawka min chhawpchhuah a duh tih ka hria a. Davidson-a ka khelh laiin ka nuin,'Pathian hian a mi thenkhat chu kawng dang daihin a thu puan chhuah nan a hmang thin. Tichuan mi tam takin Pathian hmel an lo hmuh phah bawk thin a ni,' tih thu min hrilh chuan Pathian hming langsar taka phochhuah tumna lian tak ka neih phah ta a.
"Kum 2009 kha a ni a, room-ah chuan kan chhungkuain kan thu, NBA Draft-a min thlan hun ka nghak ran, a pumpuiah pasarihnaa thlan ka ni ta a.
"Ka rinna hi hmalam min pantirtu a ni a, Oakland-ah Pathian chuan mi tha tak tak min pe a, kan head coach Mark Jackson chu Southern California congregation-a pastor a ni nghe nghe. Hetiang mi NBA coach a ni hi a danglam ve hle bawk a ni. Tin, kan team-ah hian mi 10 vel chu inkhelh hmaa Chapel-a tawngtaiho ziah kan awm a.Thlarauthianghlim chuan locker room thlengin min chenchilh ta a ni. (inkhel.com)
"Pathianin talent tha tak min pe a, heti chung hian a hma aia tha nih tumin nasa takin training ka nei chhunzawm zel a. Game a ni a, chak chang a awm a, chak loh chang a awm bawk tur a ni tih ka hre chiang. Basketball khelh nuam ka tihnachhan ber chu Mihring tana Kross lera a nun hlantu chanchin ka phochhuah theihna a ni a. Vanah hmun nuam tak ka nei tih ka hre lawk Amah avangin, chu chu he leia trophy leh sum zawng zawng pawh hian a hen lo a ni.
"He ka jersey hak piahah hian ka nihna hriltu a awm, chu chu keimaha nung Krista hi a ni."