06 Dec 2018 04:45

inkhel

ISL club enkawl turin min sawm tawh: Lothar Matthaus

German league sang ber Bundesliga ambassador ni mek Lothar Matthaus chuan Indian Super League (ISL) atanga sawmna a dawn tawh thu a sawi chhuak.

Germany legend Lothar Matthaus chuan 2014 khan India rama club pakhat chuan an club enkawl tura an sawm thu a sawi chhuak a, mahse contract neih lai a la neih avangin sawmna chu a pawm tak loh thu a sawi.

“Kum thum, kum li vel kalta khan India rama agency pakhat chuan phone atangin min rawn be nual a, India rama club pakhat enkawl turin min rawn sawm a. Mahse, hetih lai vel hian contract ka la nei si a, hei vang hian ka duh ang anga awm thei ka ni lo a, min rawn sawmna hi ka lo hnawl ta mai a ni,” tiin Matthaus chuan a sawi.

“Kei ang te min rawm sawm duh kha a lawmawm ka tiin a ropui ka ti hle a, mahse min rawn biak hun kha ka remchan loh lai a lo ni kher a, kan inhnar phah ta kha a ni a. Tunah pawh hian hmabak ka ngah khawp mai a, thil chi hrang hrang puitlin tur hian min hmuak teuh mai a ni,” a ti bawk.

A sawi zelnaah, “TV channel te leh international media hnuaiah te ka thawk a, Bundesliga ambassador te ka ni tel bawk a, India ramah pawh hemi kaihhnawihah hian ka kal a, helai hmuna ka kal thei hi ka lawm khawp mai a. Hetiang vel hi ka nih thin avangin coach emaw manager emaw ni turin hun ka nei ngang lo a. Ka ni tin hna vang hian khawi hmunah mah coach ni thei ka ni lo,” a ti.

A vawi thumna atan Lothar Matthaus hian India ram a rawn tlawh a, Kochi a Panampilly Nagar ground-a Reliance Football Youth Sports final chu a chhim a, hemi hnu hian Jawaharlal Nehru Stadium, Kochi-a Kerala Blasters leh Jamshedpur te ISL khel a en leh bawk a, he inkhelah hian 1-1 in an inhnehtawk a ni.

FIFA World Player of the Year hlui hian India ram tlawh chu nuam a tih thu sawiin, zin kual chu a nuam tih zawng a nih thu a sawi a. Thil tawn thar hi a inpeih reng tih a sawi a ni.

Lothar Matthaus hian Bulgaria national team pawh a lo enkawl ve tawh thin a, 2011 khan an inzawmna an titawp a, hemi hnu hian coaching lampang chu luhchilh leh chak mahse a indaih theih ta meuh lo a ni.