Alexander Isak chungchangah Liverpool leh Newcastle United te chuan inremna an nei ta a, an  inremna hi £130million ($176m) niin The Athletic chuan a tarlang.

Liverpool chuan Isak manah £125m an pe dawn a, a bak £5m hi chu solidarity an tih maiah a kal dawn a ni. FIFA Solidarity contribution hi player inzir chhuahna club ten an dawng ṭhin a ni.

Newcastle United chuan Isak-a manah hian £125m an dawng dawn a, Liverpool erawh chuan Isak-a manah £130m an thehchhuak thung. 

5% emaw vel chu Isak-a inzirchhuahna leh a seilenna club hrang hrangin an insem darh ve dawn a, Sweden, Germany leh Spain lama a club hlui lamin an insem ve dawn a ni.

Kum 2023 January thla khan Chelsea chuan Benfica aṭangin Enzo Fernandez an lei a, an leina man kha £106m a ni a, kha kha British transfer record a la ni reng. 

Tun nipui bazarah Liverpool chuan Bayer Leverkusen aṭangin £100-in Florian Wirtz an lei a, Wirtz an leinaah hian bonus £16m a tel bawk a, bonus emaw add-ons emaw hi chu, an chetṭhat zel dan aṭanga inpek a nih avangin, chhut tel nghal a ni ngai lo a ni.

Vawiin hi transfer hun tawpni a ni a, tihfel ngai zawng zawng an tihfel hnu zaninah emaw Liverpool chuan Alexander Isak chu British record fee-a an lak luh thu an puang dawn a ni.

Liverpool hian kum 25 mi manah hian £110m an thehchhuak phawt a, mahse Newcastle United lamin an hnar. £150m aia tlawma hralh an tum loh thu an sawi a, Isak chu chuahtir an phal loh thu an sawi chhunzawm bawk.

Hetih lai hian amah Isak berin Liverpool pan a duh a, Newcastle United nen an inkar a ṭhat tawh dawn loh tur thu a sawi bawk a nih kha.

Newcastle United pawhin forward an zawng char char a, inrinni khan Stuttgart aṭangin Nick Woltemade chu €75m-in an lei ta a, hei vang hian Isak pawh a chhuahtir phal ta a ni.