Newcastle United chuan an striker Liverpool pan ta Alexander Isak kha tawi te, midang an thlah ang lo tak leh mawi em em loin an thlah a nih kha. Chutih laiin Liverpool striker thar chuan Newcastle United chungah lawmthu sawi chungin mawi takin a thlah.

Transfer deadline day-ah khan Sweden striker hian British record transfer fee £125m-in a zawm a, hun rei tak transfer chungchang an buaipui hnuah a tum ram Anfield a thleng thei ta a ni.

Isak hian kum 2022 August thla khan Newcastle United a zawm a, Magpies tan ropui takin a khel. Competition hrang hrangah Newcastle United tan game 77 a khel a, goal 43 lai a khung.

Kumin March thla khan Carabao Cup final-ah Liverpool nen an inhmachhawn a, 2-1 in Newcastle United-in hnehna an chang a, Isak chuan goal khungin, kum 70 hnuah a vawi khat nan Newcastle United chuan Domestic Cup an chawi leh.

Newcastle hian Isak hi chhuahtir an phal lo a, Liverpool dawrna hnawl mah se, amah berin Liverpool pan a duh tlat si. Amahin training te a nei a, Newcastle United tan khelh a tum tawh loh thu thlengin a sawi a nih kha.

Newcastle chuan an striker chu an website-ah an thlah ve a, word 37 lek hmangin tawi fel tein Sweden striker hi an thlah.

Hetih lai hian Isak chuan instagram lamah, "Newcastle United-a ka khelhpui te, staff leh a thawktu zawng zawng bakah, Newcastle khawpuia mite zawng zawng chungah lawmthu sawi ka duh a ni.

"Newcastle supporter ṭha tak tak te nen hun duhawm leh theihnghilh theih tawh loh tur hun rohlu kan hmang ho.

"Kan vai mai khan football chanchina hriatreng tawh tur kan hnutchhiah a, Newcastle chu a ropuina ngaiah a let leh a ni.

"Kha zinkawnga ka tel ve thei kha ka tan chuan chawimawina a ni ringawt. Champions League khel turin an inhlangkai a, kum 70 hnuah trophy kan chawi bawk a, ka lawm kumkhua tawh a, ka lawm e Newcastle," tiin lawmthu a sawi a ni.