Rajasthan Royals chuan Chennai Super Kings hnehin pahnihna dinhmun an luah nghet ta a playoffs khel turin an tling.

Chennai lakah hian 5 wicket-in hnehna an chang a, Ravichandran Ashwin chuan Player of the Match lawmman a dawng.

INKHEL CHANCHIN

Chennai Super Kings

20 overs - 150/6

Rajasthan Royals

19.4 overs - 151/5

5 wicket-in Rajasthan Royals an chak.

Player of the Match - Ravichandran Ashwin (Rajasthan Royals)

Brabourne Stadium-a inkhelah hian toss-a chak zawk Chennai-in vuak hmasak an thlang a, duhthusamin an opener-te an che ṭha lo.

Ruturaj Gaikwad chuan run hnih lek neiin over hmasa ber a dam tluan lo chiah chiah a, a dinpui Devon Conway pawh 16 run neiin a tal na lem lo.

An thehchhuah hmasakte che ṭha lo mahse Moeen Ali hun a thleng ve ta a, 93 run siamin 4 run ringawt pawh vawi 13 lai a vawchhuak.

Team captain Mahendra Singh Dhoni pawh 26 run-ah a lungawi a ngai a, Ambati Rayudu leh Narayan Jagadeesam pheichuan tih tham an siam lo.

Chennai hian 20 overs-ah 150 run an tling a mi paruk an chan.

Rajasthan tan opener Yashasvi Jaiswal chuan 59 run neiin a che ṭha hle a, Jos Buttler erawh run hnih lek neiin a dam rei lo.

Team captain Sanju Samson chuan 15 run a thawh ve a, Ashwin langsar lehin 40 run a vawchhuak.

19.4 over-ah Rajasthan hian hnehna an chang thei a playoffs khel turin an tling ta bawk.

Bowling lamah Chennai tan Prashant Solanki chuan 2 wicket lain a langsar ber a, midang pathumin wicket khat ṭheuh an la ve bawk.

Rajasthan tan Yuzvendra Chahal leh Obed McCoy-te'n mi pahnih ve ve an vawm out ve bawk a ni.