Mizoram Basketball Association (MBBA) hriatpuinaa buatsaih, Dawrpui Vengthar Branch YMA Golden Jubilee lawmna peng pakhat, Invitational Basketball Tournament quarter final chu nimin khan khelh zawh a ni.
Nimina inkhelah Dawrpui Vengthar, Ramthar, Kulikawn leh Tuikhuahtlang te chuan an khingpui theuh an hneh a, semi final an lut a, vawiinah semi final khelh a ni ang.
Dawrpui Vengthar vs Tuikual South
Basketball uarna veng pahnih inkhel a hmuhnawmin game pawh a tang nghal at a, 1st quarter tawpah Tuikual South lamin 13-12 in hma an hruai a, Dawrpui Vengthar lamin 2nd quarter-ah pawt thla ve leh nghalin half time-ah 27-21 in an lead ve thung.
Tuikual South hi an captain Dina hoin 3rd quarter-ah an khel tha hle a, Faka leh Remruata ten theihtawp rawn chhuah bawkin point 2 chiahin an inthlauhna an ti hniam hman.
4th quarter-ah Tuikual South lamin hma an hruai zuai na a Dawrpui Vengthar lamin Ronald, Dennis leh Vanlalmuana te hmangin an chhang let a, 68-59 in Dawrpui Vengthar an chak a, semi final lut hmasa ber an ni.
Ramthar vs Tuikual North
Ramthar lamin game an thunun nghal hle a, Tuikual North lamin an dang hleithei lo. Ramtharin awlsam tein an hneh dawn emaw tih laiin 3rd quarter-ah Tuikual North lamin theih tawp an chhuah a, an pawtthla mai dawn emaw tih laiin Ramthar tan Zorina a rawn khel tha hle a, Tuikual North lam kaltluang chho lai chhang letin tum 3 zet 3-pointers a rawn nei.
4th quarter tawp lamah Tuikual North player pawimawh Afela a foul out a, Jacob, Mala leh Michael-a ten tan la hle mahse Zonuna leh a teammate ten an dang thei a, Ramthar hi 61-55 a chakin semi final-ah Tuikhuahtlang nen an inkhel ang.
Kulikawn vs Bungkawn
Mi rin aia khel tha chho Kulikawn hi an senior player Richard-a'n a rawn ho leh a, bul an tan thain an shooting a kal hle a, Bungkawn erawhin basket an nei hleithei lo, coach Samuela'n time out la nghalin Bungkawn an khel tha sawt a, 1st quarter tawpah score 13-13 a ni.
2nd quarter tan tha zawk Kulikawnin half time-ah hma an hruai a, 28-22 in an lead a.
3rd quarter-ah Bungkawn player BD-A leh Kulikawn player Richard-a te hnawhchhuah an ni a, boruak tha lo awm zui loin inkhel chhunzawm nghal niin Bungkawn lamin an hnaih tual tual laiin Kulikawn tan PC-A a rawn khel tha hle a, Bungkawn tan R-A a rawn che tha chho zel bawk a, inkhel boruak a hot hle.
4th quarter-ah an inlehthal tawn zak zak a, Kulikawn lamin R-A an dang hleithei lo a, amaherawhchu tun tournament a fighting spirit nei tha Kulikawn lamin a tawp khar tha zawkin 60-56 in hnehna an chang hram a ni. Heti hian, Kulikawn hian semi final-ah a thlengtu Dawrpui Vengthar an hmachhawn ang.
Tuikhuahtlang Vs Chawnpui
Tuikhuahtlang lamIn an khel tha nghal hle a, 1st quarter-ah hma an hruai a, 2nd quarter tir lamah Sanga'n 3-pointer vawi 3 zet a zawna a luh hmangin Tuikhuahtlang lamin hma an hruai duai hman a. Chawnpui lamin tan an la thar a, quarter tawp an khar chhe lo a, half time-ah Tuikhuahtlangin 28-20 in hma an la hruai a ni.
Ruah surin inkhel a tih khaihlak avangin chawlh lailawk a ni. Inkhel tan leh a nih hnuin Chawnpui lamin an rawn khel tha hle a, an han nih rual hman hial a, Tuikhuahtlang coach Liansangpuia'n time out a la nghal. Time out hmang tangkaiin Tuikhuahtlang lamin hma an hruai chhunzawm leh nghal a, Chawnpui lamin an pawtthla zo ta lo a, 54-46 in Tuikhuahtlang an chak ta a ni. Tuikhuahtlang hian semi final-ah Ramthar an hmachhawn ang.
Semi final fixture:
4:00 pm - Dawrpui Vengthar vs Kulikawn
7:00 pm - Ramthar vs Tuikhuahtlang