Inkhel tan tirah Ramthar Veng lam 3-points shooting that zia kan hmu nghal a, Zonuna a che tha nghal hle, 3-pointer vawi thum ngawt a lut nghal a, Reuben leh Remsanga ten an rawn thlawp tha nghal a, Ramthar Veng an fal nghal duai mai a, Dawrpui Vengthar coach ChDA'n time-out a la nghal.

Inkhel an tan leh a, Vanlalmuana’n 3-pointer tum hnih a luh bakah Ronald-a’n 3-pointer bawk a rawn lut ve leh a, score a inhnaih chho nghal thuak mai a, Vanlalmuana leh Dennis-a te an che tha chho nghal a, 1st quarter-ah Dawrpui Vengthar in 22-17 in hma an hruai.

2nd quarter-ah Dawrpui Vengthar bawk chungnungin an khel tha hle a, point 18 laiin hma hruai hman mahse Ramthar Veng player lam an rawn khel tha chho ve leh a, Remsanga leh Zorina an rawn khel tha hle a, half time-ah Dawrpui Vengthar in hma hruai mahse an inthlauhna a hnai ta deuh a, 49-38 in hma an la hruai a.

Chawlhlawk zawhah Ramthar Veng lam bawk an khel tha chho a, Zonuna, Zorina, Reuben leh Remsanga te ball inpe kual a mawi thei hle a, 3rd quarter a tawp meuh chuan Ramthar Veng lamin an lehthal hman a, score chu 63-62 a ni.

Boruak a sang telh telh a, defense lamah Dawrpui Vengthar an tal buai leh zeuh thin a, Ramthar Veng lam pawhin ho te te basket an hlah bakah free throw an luh loh fo avangin score a kal hleithei lo.

Second tlemte a la awmin Dawrpui Vengthar lamin point 3 in hma an hruai a, mahse ho taka ball an chhuah avangin Ramthar Veng lamin hun tawp dawn tepah 3-pointer an rawn luh avangin over-time khelh a ngai ta, 4th quarter zawhah 72-72 in an inhnehtawk a, inkhel a hmuhnawm hle.

Overtime-ah Dawrpui Vengthar captain a foul out avangin Ramthar Veng lam an phur thar hle a, mahse Dawrpui Vengthar tan hian 4th quarter khel chhe lo tak Tantana a rawn che ve leh a, basket a neih zeuh zeuh bakah defense lamah block a nei tha thei hle a, offensive rebounds a chuh nain Dawrpui Vengthar team tan a thawh hlawk hle a ni.

Overtime zawhah Dawrpui Vengthar hi 81-77 a chakin an champion ta a ni.