Emmanuel Petit chuan tuna Liverpool squad chu Arsenal ‘Invincibles’ ai pawh khan a duh zawk niin a sawi.
Liverpool chu tun season chhungin an che tha hle a, kum 30 zet an lo nghahfak tawh league title la thei dinhmunah an ding a, champion lai Manchester City aiin point 25 ngawtin an sang tawh a, vawi 9 chiah khelh tur an nei tawh a ni.
Jurgen Klopp leh a pawlte hian vawi hnih chiah point 3 hmuh loh an nei a, February 29 ah khan Watford chuan 3-0 in an hneh a, Arsenal-in game 49 chhung hneh loh nei miah loa record an lo siam kha game 5 in an pha ta lo a ni.
Reds hi 2018-19 season-ah pawh khan an che tha viau tho a, point 97 hmuin pahnihna an ni a, Manchester City an um pha ta lo a. Tun season hi an khel tluanchhuak thei ta a nih chuan point 100 aia tam an hmuh theih ngei a rinawm hle a ni.
Arsenal star hlui Emmanuel Petit chu 2003-04 season chhunga hneh loh nei loa league title la zingah khan a tel a. Chuti chung chuan tun hnaia Liverpool che tha chho chu a fak hle a, a team hlui ai mahin an tha zawk nia a hriat thu hi a sawi a ni.
Petit chuan, “Ka khelhpui thinte kha ka zah viau a, chutih rualin tuna Liverpool squad en chung leh tun hnai kum hnih chhunga an chet dan ngaihtuahin an tha ka ti a, Invincibles ai mahin an tha ka ti zawk,” a ti.
“Hetiang taka team tha, an khingpuite aia chungnung thei em em zel, chak deuh zel bawk si hi an awm tam lo hle a. Hetiang taka ropuia che thei hi chuti maia fawm khawm theih an ni lo,” a ti bawk.
A sawi zelnaah, “Arsenal Invincibles leh Liverpool te hi team ropui tak ve ve an ni a, ka tan chuan tuna Liverpool team hi an tha mah mah zawk a. He team ka thlir apianga ka awm dan leh ka rilrua thil awm dan hi ka sawi fiah thiam chiah lo a. Invincibles ka hmuh leh ngaihtuah hian chutiangin ka awm ngai lo a, Arsenal team ai kha chuan Liverpool team hian min hneh zawk daih a ni,” a ti.
“Ka ngaihdan ka sawi chhuah vang hian Arsenal tantute chu an lawm chiah lo ang tih chu ka hrethiam a, chutih rualin thudik ka sawi chhuak ve a ni mai a, ngaihdan a inang vek thei tlat lo a ni,” tiin Petit chuan a sawi.