20 Jan 2018 05:47

inkhel

Intihhlum ka tum fo țhin - Phelps

American swimmer Michael Phelps chuan a huntawn san laiin vawi tam tak a nunna lak mai a duh țhin tih a sawi.

Kum 32 mi Phelps hian Olympics-ah gold medal ringawt pawh vawi 23 la tawhin Olympian zinga hlawhtling ber a ni a, intihhlum a tumna hmasa ber chu kum 2004-a Athens Olympics zawh hnu khan a ni.

Olympics-a medal 28 la tawh Phelps chuan, "Olympics zawh apiangin rilru lama harsatna ka nei niin ka hria. In enkawlna ka neih hmasak ber ni kha ka la hria a ka nghing dawt. A chhan chu ka hmaa danglamna awm turin min ti zam hle. Engnge thleng tih erawh ka hriatchhuah a țul si." tiin a sawi.

London-in a thlen kum 2012 Olympics zawh hnu khan harsatna nasa takin a tlakbuak tih a sawi bawk a, heti hunlai hian dam a chak lo va infiamna luhchilh pawh a duh tawh lo tih a sawi.

Associated Press Athlete of the Year-a vawihnih an thlan tawh Phelps hian kum 2012 Olympics zawh hnu khan infiamna chawlhsanin kum hnih hnuah a kir leh a, Olympics zawh hnu khan a pindanah ni thum emaw ni nga chhungte a inkhung tawp țhin.

Infiamnaa a kir leh hnuin kum 2016 khan Rio Olympics-ah telin gold medal panga leh silver medal pakhat a hleuhchhuak a, hlawhtlinna a chante aiin a nun hrehawm tak ațanga a talchhuah hunlai kha nuam a tih zawk thu a sawi.

Sawi chhunzawmin Phelps chuan, "Hun harsa ka paltlang hun lai kha Olympic gold medal lak ai pawhin a nuam zawk a, ka nunna ka la ta lo hi ka lawm tak meuh meuh." tiin a sawi.