01 Nov 2019 09:36

inkhel

Intibuai Embiid leh Towns an hrem

Joel Embiid leh Karl-Anthony Towns te chu an inkhelh laia an intihbuai avangin thuneitute chuan an hrem a, game 2 khel thei lo tura hrem an ni.

Philadelphia khawpuia Philadelphia 76ers leh Minnesota Timberwolves te inkhelh laiin Joel Embiid leh Karl-Anthony Towns te hi an intibuai a. An intibuai hi coach te leh player pahnihte teammate te chuan an thelh a ngai hial a, chumi hnuah chuan an hnawtchhuak zui ve ve a ni.

Philadelphia 76ers leh Minnesota Timberwolves te inkhelah hian Sixers chu 117-95 in an chak a. Third quarter an khelh laiin Embiid leh Towns te hi an intibuai a, an innawr deuh nual a. Coach te leh an teammate te’n an thelh hma hian Towns chuan Embiid chu a hnek thawi thuak a, Embiid hian Towns chu a mitah a kawmsak ve bawk a ni.

He buainaa inhnamhnawih ve tho, Sixers player Ben Simmons chu engtin mah an hrem ve lo thung a ni.

Embiid leh Towns te intihbuai lai hian Ben Simmons chu lo inrawlhin, Towns chu a hrawkah a lo kuah bet a, a lo bawh bet deuh niin an sawi a. Hetianga a lo che ve hi thuneitu lampang chuan buaina thelhtu a ni tiin an sawi a, hei vanga hrem ve lo hi an ni a. Timberwolves lampang chuan Simmons chet dan chu buaina thelh tum vang a ni lo tiin an tang ve thung.

Hemi zanah hian social media lamah Embiid leh Towns te hi an inngur zui leh bawk a. Naktuk atang hian Embiid chuan hremna hi a hmachhawn tan dawn a, 76ers chuan Portland Trail Blazers an lenchilh dawn a ni.

Towns pawhin naktukah hremna hi a hmachhawn tan ve dawn bawk a, Timberwolves chuan Washington Wizards chu an lenchilh ve dawn bawk a ni.