Khawchhak lungpui a lum a, Aizawl lum thlengin dang thei an awm lo, LBS Suzuki All Mizoram Inter Village football Tournament semi final-ah Champhai Kanan VC leh Sialhawk VC te chuan an khingpui an hneh ve ve a, July ni 19, 2022 (Thawhlehni) tlai dar 3:00-ah final khelh tur a ni.

12:30PM Sialhawk 2-2 Ramhlun N

(Danmawia 10', Muankima 86') (K. Rosanga 32', Lalpekhlua Jongte 69')

Penalty Shoot-Out--ah Sialhawk VC 4-2 in an chak

Inkhel hmasa zawkah Sialhawk VC leh Ramhlun North LC te an inhmachhawn a, team hnihte hi hun pangngaiah 2-2 in an inhnehtawk a, extra time khelh zawhah pawh an la inhnehtawk zel avangin penalty shootout hmanga chak zawk zawn a ni a, hetah hian Sialhawk chuan 4-2 in hnehna an chang ta a ni.

Goal hmasa ber hi minute 10-na leka lut a ni a, Crespo free kick chu near post atangin Danmawia chuan a lo tauh pial, far post-ah mawi takin a thlawk lut. Minute 32-ah Rosanga chuan Ramhlun North siphurh a rul, mual dinglam atanga ball thlawh luh tha tak chu Rosanga chuan umin defender ten an phak lo hle, cool takin bottom corner-ah a chhuih lut, half time a nih chuan team hnih te 1-1 in an inhnehtawk.

Second half minute 69-ah Lalpekhlua chuan box pawn atangin a shot, Sialhawk defender ten an lo tawk kawi, goalkeeper tan tih ngaina a awm lo, goal-ah a lut a, 2-1 in Ramhlun North chuan hma an hruai ve ta. Sialhawk an khel tha tual tual a, an fit tih a hriat. An siphurh rulh tumin an nawr na hle nghe nghe.

Hun tawp dawn minute 86-ah an siphurh an rul ta nge nge. Goalkeeper-in a man theih loh hnuin buai nuai nuai karah Muankima chuan hnai set sawt atangin a ti goal a, hun a tawp chhunzawm. Team hnihte 2-2 in an inhnehtawk a, extra time khelh a ni a, hetah hian Sialhawk lam an fit zia a lang chhunzawm zel, chutih laiin goal erawh a luh tawh lo.

Penalty shootout hmanga chak zawk zawn a ni a, hetah hian Ramhlun North lamin vawi hnih an pet goal lo. Danmawia chuan penalty hnuhnung ber chhuihin a chhuih goal a, 4-2 in Sialhawk chuan hnehna an chang a, Inter Village Football Tournament-ah final an lut ta a ni.

Inkhel hmuhnawm tak a ni a, AR Lammual-ah inkhel entu mipui an leng lo, Zodin Cinema hall bul fly over bridge atang pawhin an en thup a, AR Lammual chhunga inkhel en theihna zawng zawng chu a khat vek a ni. Mizo mipui te hian football kan ngaina a, Inter Branch YMA Tournament leh Inter Village Football Tournament hi chuan hlut a hlawh a, tun tournament-ah hian football team-ten sum tam tak seng mah se talent tha tak tak kan hmu thar hnem hle mai.

4:00PM Lengpui VC 1-2 Champhai Kanan VC

 (Laltlanzova 53') (Jacob Lalrinnunga 67', Lalchhawnkima 87' ) 

Semi final hnuhnung zawkah Champhai Kanan VC chuan 2-1 in Lengpui VC an hneh a, inkhel hmuhnawm tak mipui te hmuhah an chhawpchhuak. First half-ah goal a lut lo, second half minute 54-ah Kimkima ball vawrh luh tha tak chu Laltlanzoa chuan umin goalkeeper rawn up-in ball a tawh hmain Zozoa hian ball a tawk a, a tauh goal mawi hle.

Minute 67-ah Lengpui chuan veilam sir atangin free kick an hlawhchhuak a, hei hi Jacob Lalrinnunga chuan hnai set sawt atangin a tauh goal, Lengpui chuan an siphurh an rul ta.

Inkhel hmuhnawm tak a ni a, first half lamah Champhai kanan khel thain game thunun mah se second half-ah Lengpui an rawn khel tha tual tual a, an siphurh an rul ta nge nge a, hemi hnu hian inkhel inbuktawk tak a ni chhunzawm a, hun tawp dawn tak tak minute 87-ah Lalchhawnkima chuan Champhai Kanan chakna goal a khung a, hei hi Lengpui lamin an rul thei ta lo, 2-1 in Champhai Kanan chuan hnehna an chang a, final-ah Sialhawk nen an inhmachhawn dawn ta a ni.