SBI Life Insuarance 7th Inter School Basketball Championship 2015 chu semifinal khelh zawh a ni ta a, vawiin (Ningani) khan Govt.Mizo HSS, St'Pauls (Girls) leh St.Pauls HSS ten an khingpuite theuh hnehin final an lut ve leh ta. Thawhlehni kalta khan High School leh Middle School ten semifinal an khel zo tawh a, vawiin (Ningani)ah Higher Secondary School leh Girls semifinal an khel zo ve leh ta a ni.
Govt.Mizo 'A' 65 - 59 Home Missions(HSS); St Pauls 28-10 Helen Lowry (Girls); St.Joseph 95-83 St.Pauls (HSS)
Inkhel hmasa berah 65-59-in Govt.Mizo 'A' HSS chuan Home Missions School an hneh a, quarter hnuhnung berah mak tak maiin Govt.Mizo HSS chuan Home Missions hmahruaina lehthalin hnehna an chang. Hun tawp hma second 40 vel la awm chu Govt.Mizo HSS lamin an hmang tangkai hle mai a, a bikin Joseph-an a thawhhhlawk hle a, point 20 zet mai he inkhelah hian a thun a, Home Mission tan LT Thanmawia'n point 14 a thun ve bawk.
Team pahnihte hi quarter hmasa ber atangin an inhnehtawk tak zet a, chungnung zawk awm thei lovin point 12 ve ve nen quarter an khar. Quarter hnihnaah Home Missions an khel tha hle a, point 21 an hmuh belh theih laiin Govt.Mizo HSS-in point 12 bawk an hmuh belh a, half time-a an dinhmun chu Govt.Mizo HSS 24- 33 Home Mission a ni. 3rd quarter Govt.Mizo HSS game a kang chho hle a, point 18 hmuh belhin Home Missions-in point 15 an hmuh belh a, an inkar tlemin a zim leh hret.
Quarter hnuhnung berah Govt.Mizo HSS game a pui hle mai a, an defence a that rualin an nawr hle a, basket pawh an ngah hle a ni. Point 22 zet mai sualchhuakin hun tawp hma second 40 la awm-ah inlehthalna ropui an thlen tir thei a ni. Home Mission chuan 4th quarter-ah hian point 11 chauh an hmuh belh a, an ui khawp ang le.
Girls final luh inchuhnaah 28-10 in St.Pauls chuan Helen Lowry an hneh a, final an lut. Helen Lowry lamin basket an nei hlei thei lova , St.Pauls-in point 12 nen bul an tan chho. Quarter tinah an chungnung chho zel a, 4th quarter-ah Helen Lowry-in tan han la ve bawk mahse chak tur a chiang tawh hle a, phu takin St.Pauls hmeichhe naupangte an tlang ta a ni. St Pauls tan jersey No.11 Zorini chuan point 11 zet a thun a, hei hi an khingpui Helen Lowry team thun zawng zawng ai pawhin a tam! Final-ah Govt.Mizo nen an inhmachhawn dawn a, Govt.Mizo HSS Girls team te hi semifinal-a Mary Mount hnehtute an ni.
Semifinal hnuhnung berah St.Joseph chuan 95-83 a St.Pauls hnehin Higher Secondary inelnaah final an lut a, a hmuhnawm kher mai. St.Joseph-in bul an tan tha a, 1st quarter atanga 4th quarter thlengin tha thlah lovin an tangmar thei. Hetihlai hian quarter hnuhnung berah St.Pauls-in pawhthlak ngei tumin thapui an thawh a, basket pawh a tam hle a ni.
Quarter hmasa berah St.Joseph School-in 21-15 in hma an hruai nghal a, quarter hnihnaah erawh point 22 ve ve an thun aq, half time-a an dinhmun chu St.Joseph chuan 43-37 St.Pauls a ni. 3rd quarter-ah pawh tlemin St.Joseph an pawng a, point 25 an hmuh belh a, St.Pauls lamin point 22 an hmu. Quarter hnuhnung berah an inbei na hle a, St.Pauls-in thapui thawhin point 30 zet mai an hlawhchhuak naa an pawtthla zo ta lo.
St.Joseph School-in point 21 an hmuh belh a, hnehna an chang ta a ni. St.Joseph School tan Jersey No.25 Chuaudinga chuan point 30 a thun a, St.pauls tan jersey No.8 Lalthazuala chuan point 29 a thun ve bawk.
Final hi Sept.9.-ah neih a ni dawn a, tlai dar 3:00-ah kharna hun official function neih a ni ang a, Sports Minister Zodintluanga chu khual lian a ni ang.
Final fixture (9.9.2015)
10:00 AM CSDC vs Rosebud (Middle School)
11:30 AM Govt.Mizo School vs St'Pauls (Girls)
01:00 PM Rev.Saiaithanga vs St.Pauls (High School)
02:30 PM St.Joseph vs Govt.Mizo 'A' (Higher Secondary)