10 Sep 2015 07:08

PC Lala

inkhel correspondent and photographer

​Inter School Basketball Championship zawh fel a ni ta

SBI Life Insurance 7th Inter School Basketball Championship 2015 chu September ni 9, 2015 khan Hawla Indoor Stadium Republic Vengthlangah zawh fel a ni. Final-ah hian Pu Ngunlianchunga, AH & Vety Minister chu khuallian a ni a, he inelna ropui tak hi a khar a ni.

Higher Secondary School-ah St. Joseph HSS an champion a, High School-ah St. Pauls an champion bawk. Hmeichhe lamah Govt.Mizo HSS an champion a, Rosebud school chu Middle School Champion an ni bawk.

Champion team-in Computer Set bakah trophy leh medal an dawng vek a, pahnihna hian Refrigerator bakah trophy leh medal an dawng vek bawk. Tel zawng zawngin Steel Almirah an dawng vek bawk a ni.

Final hmuhnawm takah St.Joseph HSS hian 97-87 in Govt Mizo an hneh a, High School final-ah St.Pauls chuan 51-22 in Rev.Saiaithanga Memorial School hnehin an champion ve bawk.

Hmeichhia final-ah Govt.Mizo HSS chuan 33-28 in St.Pauls an hnehin an champion a. Middle School final-ah Rosebud School chuan 55-33 a Centenary School Dawrpui (CSDC) hnehin an champion ve bawk a ni.

Higher Secondary School final-ah rinlawk ang ngeiin St.Joseph leh Govt Mizo an inhnehtawk hle a, hmahruai hlei thei bik awm lovin 1st quarter-ah point 17 ve ve an hmu a. 2nd quarter-ah St.Joseph an pawng hret a, jersey No.25 Chuaudingliana a tal na hle. Halftime-ah St.Joseph HSS-in 41-39 in hma an hruai a, hmahruaina derthawng tak hi lehpelh tumin 3rd quarter-ah Govt Mizo hian an nawr na hle a, mahse an lehthal zo ngang lo.

Quarter hnuhnung ber hun tawp lamah Govt Mizo an beidawng tih a hriat, an inthlauhna point 5 vel chauh ni mahse minute 1 vel hun la awmah basket nei hlei thei lo zawk an ni a. An tang ulh tawh a ni ber mai. An foul apiang team penalty a nih tawh avangin an inthlauhna sang chho hret hret zel a, a tawpah St.Joseph sanna chu point 11 zet a tling chho ta a ni.

St.Joseph tan hian Jersey No.22 Emmanuel Lalfakawma chuan point 28 zet a thun a, Jersey No.0 Zonuna pawh coach H.Laldinsanga'n a luh tam tir lo na a, atangkai hle a ni. Govt Mizo lamah jersey No.23 Vanlalhruaizela chuan point 16 thunin mimala chetha ber a ni ve bawk.

High School final-ah phu takin St.Pauls naupangten hnehna an chang. An khingpui Rev.Saiaithanga School chu 51-22 a hnehin quarter tinah an chungnung tluan zak a ni.

Halftime-ah 27-13 in St Pauls hian hma an hruai hman a, an game leh point dinhmun thlirin chak zawk tur a rin hriat chhoh theih nghal.

Hmeichhia final-ah Govt. Mizo HSS chuan 33-28 in St.Pauls an hneh. Inkhel inhnehtawk takah Govt, Mizo HSS hian a tir atangin hma an hruai a, 4th quarter-ah St.Pauls-in an pawtthla teuh hle.

Rosebud hian 55-33 in Centenary School, Dawrpui an hneh. Champion thar an ni. Centenary School, Dawrpui (CSDC) hi champion lai an ni a, nikum khan Mary Mount hnehin an champion a, kuminah an title an humhim zota lo a ni.

Inkhel tirh atangin Rosebud an chungnung chho nghal, half time-ah 26-15 in hma an hruai a. CSDC-in player tha leh thun thei Lalrinhlua nei bawk mahse amah thlawp zo an awm lo, team game hmuh tur a tam lo. 3rd quarter-ah pawh Rosebud an chungnung chho zel a, 49-29 a hma hruaiin CSDC tan beisei a bo tan, Rosebud lam an phur tual tual a, hun a tawp meuh chuan 57-33 in hnehna an chang ta a ni.