Inter School Basketball Championship 2015 mipa leh Hmeichhia khel dawn

01st August 2015, 02:08AM

Inter School Basketball Championship 2015 (Boys & Girls) chu August ni 11,2015 Thawhlehni atangin Hawla Indoor Stadium, Republic Vengthlangah khelh tan a ni dawn. August ni 11,2015 Thawhlehni atang tho hian High School-in an khel tan ve bawk dawn a ni.

August ni 14,2015 Zirtawpni atangin Higher Secondary School-in an tan ve ang a, August ni 27,2015 Ningani atangin Middle School ten an khel chho ve leh ang a, final hi September thla chawlhkar hnihna velah khelh theih beisei a ni.

Mizoram Basketball Association chuan Inter School Basketball khel tur tan kum bithliah fel tak a siam a, Middle School-ah kum 2001 a piang chin, kum 2015-a kum 14 tling turten an khel thei ang.

High School-ah kum 1999 a piang chin, kum 2015-a kum 16 tling an ni tur a ni a, Higher Secondary School-ah kum 1997 a piang chin, kum 2015 a kum 18 tling an ni tur a ni.

Hmeichhe team-ah inthen hranna siam a ni lova, Class 1 atanga HSS thleng pawhin team khatah inthlanpawlhin chhuah vek theih a ni bawk.

Repeater tan hetiang hian khel thei tur ruahmanna siam a ni bawk. Middle School Class IV an pass atanga kum 6 thleng, High School Class VIII an pass atanga kum 3 thleng leh Higher Secondary School Class X an pass atanga kum 3 thleng a ni ang.

School tel tur te tan August ni 4-6,2015 tlai dar 5 thleng entry fee Rs 500/ (per team) pek theih a ni a, kir leh theih tur Security Deposit Rs 1000/- pek tel nghal tur a ni bawk.

August ni 7,2015 Zirtawpni tlai dar 3:00PM ah Hawla Indoor Stadium dining hall-ah Managers Meeting neih tur a ni a, manager te hi an school zirtirtute an ni ngei tur a ni. Heng hmunah te hian entry fee pek tur a ni. Samsung Plaza, Sikulpuikawn leh The Y2goal Angency, Chanmari.

Copyright © inkhel.com 2024. All rights reserved.