Tuna Tottenham manager Jose Mourinho chuan kum 2010-a UEFA Champions League-a Inter Milan a champion pui tum khan mahni hma a sial loh thu a sawi chhuak.

Vawiin (22/5/2020) hi Mourinho-a’n Inter Milan treble a champion pui kum 10-na chiah a ni a, kum 10 kaltaa an thil tawn thlir kirin Mourinho chuan a bikin Champions League final-ah khan a mah aiin midang a dah pawimawh zawk thu a sawi.

May ni 22 kum 2010 khan Mourinho-a team enkawl Inter Milan chuan Champions League final inkhelah Bayern Munich hi si hnih faiin an hneha, hemi season hian Inter hi Champions League bakah Serie A leh Coppa Italia-ah te an champion a, Mourinho hi Champions League-a team hrang pahnih champion pui thei pangana a ni nghe nghe.

Mourinho chuan kum 2010-a Champions League nomawi an chawi chungchang sawiin, “Final-ah Bayern Munich kan hmachhawn khan, vawi khat mah keima lampang ka ngaihtuah lo. Kan chak chuan Champions League nomawi vawi hnih k chawina tur tih te, kan champion chuan FIFA Manager of The Year lawmman ka dawn tur te ka ngaihtuah lo. Ka chungchang vawi khat mah ka ngaihtuah lova, midang tana lawmna thlen chiah kha ka thil tum a ni.

“Ka tan kha chuan kan chairman Massimo Moratti-a’n Champions League nomawi a hlut zia leh kan club captain leh legend Javier Zanetti tana he nomawi chawi a hlut zia tur te bakah player-te leh fans-te tan a hlut zia te bak kha thil pawimawh zawk a awm lova, mahni hma sial loh kha pawimawh berin, ‘selfish’ thei ka ni lo a ni,” a ti.