Inter Milan chuan Juventus leh Chelsea manager hlui Antonio Conte chu an manager atan an ruat thuai dawn niin Sky Italia chuan a tarlang.

Sky Sports lam pawhin kar hnih liamta khan Inter Milan leh Conte-te chu an inrem tep tawh thu a lo tarlang tawh a, a tak ram a thlen thuai a rinawm chho hle.

Serie-a lamah game khat khelh tur a la awm a, tunah hian Inter hi palinaah awm mekin, season tharah Champions League an khel duh a nih chuan season khar niah hnehna an chan ngei ngei a ngai.

Tun kar tawp hian Serie A khelh zawh a ni dawn a, hemi hnu hian Inter hian an manager chhawr mek Luciano Spalletti chu an ban zui dawn niin a langa, Serie A lama tawnhriat ngah tak Conte an lakluh chhunzawm a rinawm.

Inter Milan manager thar tura rinkai ber Conte hi nikum July thla khan Chelsea chuan banin, tun thlengin club enkawl a la nei leh lo.

Conte hian football a khelh laia kum 13 zet a lo chenchilh tawh Juventus chu a lo enkawl tawh thin a, Juventus-ah hian season thum awmin, season tin Serie A title a lakpui.

Kar leh lam chuan Conte hi Inter Milan chuan an lak mai a rinawm tawh a, Chelsea-a enkawl hnuah rawn kirin ropui taka a lo chet tawhna Serie A lamah bul a tan thar leh dawn niin a lang a ni.