Arsenal midfielder Mesut Ozil chu Inter Milan chuan lak an hnial lo a, January thla hian Emirates Stadium atanga chhuah theihna hun remchang siamsak an tum.

Mesut Ozil hian Arsenal-ah kar khat chhungin £350,000 a hlawh mek a, Arsenl player zingah chuan hlawh sang ber a ni a, a sang fal viau nghe nghe a. Heti chung hian a khelh danah sawisel a hlawh nasa hle a, tun hnaiah phei chuan manager Unai Emery chuan a chawlhtir ta zeuh zeuh a ni.

Arsene Wenger thlaktu Unai Emery chuan Ozil-a khelh dan chu a duh loh avangin German midfielder hi a khelhtir lo ta zeuh zeuh a. Tun hnaia Arsenal match hnuhnung pathumah Ozil hi a tel tawh lo a, a hnung nat vanga tel lo niin chhuanlam an siam a. Premier League game a khelh hnuhnun ber chu November 11 kha niin, hemi tum hian Gunners chu Wolverhampton Wanderers nen 1-1 in an inhnehtawk a ni.

Ozil hian October thla tawp khan Leicester City lakah goal a thun bakah midang thun tur vawi khat a siamsak a, hei bak hi chu goal-ah inrawlhna a la nei leh miah lo a. Arsenal thuneitute chuan a hlawh san ang hua an beisei anga a chet theih meuh loh avangin Ozil hi chhuahtir mai an duh tan tawh a ni.

Unai Emery chuan inhliam vanga a chhawr theih loh tur Danny Welbeck thlaktu tur a mamawh hle a, January thla hian striker thar lak a rilruk thut thei a. Hetiang a nih chhoh avang hian chhawr mumal loh tur, hlawh sang bawk si kawl reng ai chuan hralh theihna a hmuh remchangah Ozil hi a hralh lo ang tih a sawi theih loh a ni.

Inter Milan hian Mesut Ozil chungchangah Arsenal chu an dawr chhin tawh niin an sawi a, January thlaa £25 million vel bawra lei an dil nia sawi a awm a. Ozil-a agent leh a unaupa Mutlu te chu Italy lamah an kal mek niin an sawi a, Nerazzurri lama Ozil kal theih dan tur an ngaihtuah dawn niin an sawi.