01 Aug 2020 04:43

inkhel

Inter Milan in Lionel Messi an ngam huai

Lionel Messi leh Italian club lian Inter Milan an sawi zawm mek a, Camp Nou lama a contract a hman zawh hunah Serie A club hian Argentine superstar hi £235 million zeta lei an inhuam niin an sawi.

Barcelona thiampuipa Lionel Messi chuan Camp Nou-ah 2021 thleng contract a nei a, contract thar a ziak duh rih lo niin an sawi a, hei vang hian a contract neih lai a hman zawh hunah hmun dang a pan duh mai ringtu pawh an awm hlawm a ni.

Kum 33-a upa Messi hian Barcelona chhuahsan a tum a nih chuan Inter Milan chuan lei an tum ngei an ring viau hlawm a. Nerazzurri nen hian vawi eng emaw zat chu an lo sawi zawm tawh a, kum tharah chuan Italy ramah Messi hi a kal lo ang tih sawi theih a ni lo.

La Gazzetta Dello Sport in an tar lan danin Inter Milan hian Argentine forward hi Catalonia atanga thlem chhuah dan kawng an zawng dawn a, thlem chhuak thei tur hian sum pawh an tawktarh hnem hle niin an tar lang bawk a ni.

Tun hnaiah Messi chu an club inkaihhruai dan kawng thenkhatah a lungawi chiah lo niin an sawi a, an team che fuh thei meuh lo te pawh a vei hle niin an sawi bawk a. Beisei anga an chet that theih loh avangin La Liga title pawh an la thei ta lo a, an hmelma lian Real Madrid chu an champion ta daih a ni.

Inter Milan hian Messi hi £235 million vel zeta lak luh an inhuam niin an sawi a. An lei thei dawn a nih chuan Nerazzurri hian Messi chu kum li chhung atan contract ziahpui an duh a, kum khatah £60 million zet hlawhtir an inhuam dawn a ni.

Serie A club Inter Milan hian Messi chu rawlthar a nih lai atang tawhin lak luh an duh niin an sawi a, a tak ramah erawh an la lut thei ta lo niin an sawi a. Inter Milan president ni mek Steven Zhang chuan 2016 kumah pawh khan Messi hi lak luh dan kawng a lo dap nasa tawh viau a, Financial Fair Play (FFP) vangin hma a la thui ta lo niin an sawi.