Italian club Inter Milan chuan Paris Saint-Germain striker contract hmang zo mai tur Edinson Cavani chu a thlawna lakluh ngei an tum tih Sky Italia chuan a tarlang.

Cavani hian kumin nipui hian PSG-a a contract a hmang zo dawna, tun thlengin PSG nen contract thar chungchangah inremna an la neih loh avangin club dangin an dawr thei tawha, Inter Milan pawhin an dawr ngei niin a lang.

Inter hian nipui bazar hunah an striker Lautaro Martinez chu Barcelona hnenah an chan ngei dawnin a langa, hemi a nih avang hian Romelu Lukaku-a khelhpui turin Uruguayan striker Cavani hi lakluh an tum nia tarlan a ni.

Cavani hi Serie A lamah a mikhual lo sa hle a, PSG-a a kal hma hian Palermo leh Napoli tan te a lo khel tawha, Napoli-ah hian che tha hle in, khawvelin a hriat tanna pawh a ni a tih theih awm e.

Kum 33 mi Cavani hi naupang tawh lo mahse striker tha leh hriam tak a la ni a, hemi a nih avang hian club dang te pawhin a thlawna lakluhna chance hi hman tangkai an tum hle a, Atletico Madrid, Chelsea leh Tottenham te nen pawh nasa taka sawizawm mek a ni.