Inter Milan striker Romelu Lukaku chuan Manchester United a chhuahsan hnuah a puitlin chhoh thu a sawia, Inter Milan-ah nasa takin puitlin lam a pan thu a sawi.

Lukaku hian kum 2017 khan Everton atangin Manchester United hi a zawma, a manah United hian pound maktaduai 75 chho lai seng mahse Old Trafford-a a cham chhungin kum 26 mi hian beisei a pha lo a tih theih awm e.

Nikum nipui khan Italian club Inter Milan chuan United atangin Lukaku hi an lei chhuaka, a man hi euro maktaduai 80 bawr vel nia sawi niin kum nga daih contract a ziak.

Inter a zawm hnuah Belgium tana goal khung hnem ber Lukaku hian goal a khung thei nghal hle a, season kal mekah hian Inter tan game 25 khel tawhin goal 17 a khung tawh.

Lukaku chuan, “Kan puitlin chhoh zel hi chuan mahni chauh hi kan pawimawh tawh lova, goal khung hi ka damdawi a ni a, ka dam nana ka thil mamawh a ni. Kan lo upat chhoh hian kan lo fing chho ve zela, team ka pui duh tak tak a nih chuan goal khung mai bakah assist ka neih a pawimawh tih ka inzir chho.

“Keimah chiahin goal khung a theih lova, ka bula mi pawh hian goal a khung ve a ngaia, kan vaiin kan pawimawh a ni tih kan inhriat vek a ngai. Ka shoot ziah a rem tawh lova, pass tur an awm phawt chuan pass tur ka melh ziah tawh a ni,” a ti.