Lionel Messi chuan Inter Miami chu a club hnuhnung ber tur a nih thu a sawi rualin, tun hnaiah mai chuan chawlh erawh a tum lo thung.

Ballon d'Or vawi 8 dawng tawh kum 36 mi hian nikum khan PSG chhuahsanin, Major League Soccer Club Inter Miami a zawm a, kum 2025 thleng contract ziakin, hetah hian pawhsei theihna ziah tel a ni bawk.

Barcelona tana a khelh lai khan Messi hian champions league no mawi vawi 4 a chawi a, La Liga title 10 lain, 2022 World Cup-ah khan a champion bawk.

"Inter Miami hi ka club hnuhnung ber tur niin ka ngai, chutih laiin football chawlhsan mai erawh ka la tum lo deuh," tiin Messi chuan ESPN a hrilh.

Tun season MLS-ah Messi hian game 12 atangin goal 12 a khung tawh a, assist vawi 12 a nei tawh bawk.

Tunah hian Copa America khel turin an inbuatsaih mek a, Copa America hi United States-ah khelh a ni dawn avangin Messi-a tan chuan ram dang pan a ngai dawn lo.

"Europe atanga US pan hi a har ka ti ve hle, chutih laiin World Cup no mawi kan han chawi takah chuan, ka thil thlir dan a danglam ta a ni.

"Football khelh hi nuam ka ti a, training te hi ka hlimpui em em. Match khelh hi nuam ka ti a, ka football career hi a tawp mai ang tih ka hlau thin.

"Ka chawlh a hnaih tak avang hian, football-a ka hun tawn engkim hi a hlu zual a, ka inkhelh tawh loh hunah chuan heng hun te hi ka la ngai vawng vawng dawn a ni," tiin Messi chuan a sawi bawk.