Inter Milan chuan Manchester United atangin English mi Ashley Young chu an lalut fela, Young-a manah hian Inter hian pound maktaduai 1.3 sengin thla ruk daih contract an ziahpui.

Inter hian Manchester United captain hlui Young hi thla ruk daih contract chiah ziahpui mahse an duh chuan kum khat dangin an pawhsei belh thei dawna, Young-a chet that dana zirin hei hi kalpui a ni dawn.

Ningani ni khan Inter leh United-te inkarah hian Young-a chungchangah inremna a awma, nimin lam khan Young hi Milan-ah medical nei tura thlawk lutin an inlei fel zui nghal.

Inter hian nikum nipui atang khan Old Trafford chu bazar nan an hmang a ni bera, Young bakah hian nikum nipui lai khan Romelu Lukaku chu lo lei tawhin, Alexis Sanchez pawh loan-in an lo lalut tawh.

Kum 34 mi Young hi tun season-ah United tan a la inlan tam lo hle a, vawi 18 inlan tawhin vawi 10 bak league-ah inkhel bul a la tan lova, tun thla tir lam khan United chuan kum khat daih contract zawrh mahse Young hian hnarin San Siro lamah a inpu lut ta a ni.

Young hian kum 2011 khan Aston Villa atangin Manchester United hi a pana, United tan game 261 khel hmanin goal 19 a khung hman.

United hian an captain ni lai Young an hralh tak avangin nikum nipui bazar-a an lei; khawvela defender manto ber Harry Maguire chu an captain thar atan an lo ruat fel ve tawh bawk a ni.