Inter Milan vice-president Javier Zanetti chuan Manchester City atangin Ivory Coast midfielder Yaya Toure an lalut fel tep tih a sawi a, Thiago Motta pawh PSG atangin laklet an tum tih a sawi bawk.

Toure hian kum nga chhungzet a awmchilh tawh Manchester City hi tun nipuiah chhuahsan a hreh lo niin sawi a awm a, alo hrawn tawh thin Roberto Mancini hnuaia khel turin Italian club hi a pan nge nge maithei.

Ivorian midfielder chungchang hi an zawhna chhangin Zanetti chuan, "Kan thlen chin atang hi chuan kan lakluh theih ngei kan inbeisei." tiin Gazzetta dello Sport hnenah a sawi.

Kum 32 mi Toure hi tun dinhmuna Manchester City player hlawh hnem ber niin sawi a ni a, kar khatah £220,000 a hlawh niin tarlan a ni. Tun season Premier League-ah City tan game 28 khelin goal 10 a khung tawh a, kum 2013 April thla khan City tan hian kum li daih contract a ziak.

Argentina defender hlui Zanetti hian Paris Saint-Germain midfielder Thiago Motta laklet an tum tih a sawi bawk a, Italian midfielder hian season thum chhung Inter tan a khelh hnuin kum 2012 khan French club hi a pan.

Sawi chhunzawmin Zanetti chuan, "Motta hi a lo lut anih chuan a tangkai viau ang. Club hi a hrechiang a tawnhriat an nei tha bawk. A thiam a midfielder ka khelhpui tawhah chuan tha ber pawl ala ni."

"A fing em em a he'ng player pahnihte hi kan lalut anih chuan kan thatpui ang." tiin a sawi.

Motta hian season khat daih chiah PSG-ah contract a nei tawh a, tun season French Ligue 1-ah game 24 a khel a an champion bawk.

Inter Milan hi Serie A table-ah pariatna an ni mek a, game hnih khelh hmabak an la nei.