Inter Milan chu Manchester United atanga Ashley Young an lakluh hnu lawkah Chelsea player Victor Moses chu an la lut leh tep tawh niin chanchinbu mite chuan an tarlang.

Moses hian Inter hi loan-in a zawm phawt dawna, hemi hnu hian Inter chuan pound maktaduai 9 velin an lei nghet thei dawn nia tarlan a ni.

Tunah hian Moses hi Turkish club Fenebahce tan a khel meka, Chelsea-ah a kir zuai anga Inter lam a pan zui nghal dawna, Chelsea-a a lo hrawn tawh Italian manager Antonio Conte nen an inhrawn leh dawn a ni.

Moses hian kum 2012 daih tawh khan Chelsea a zawma, inkhelhna hmun a chan hleitheih loh hnuah Conte-a’n Chelsea a enkawl khan Moses hi winger atangin wing-back ah a chhuaha, hetah hian Moses hi parvulin Chelsea hi Premier League-ah an champion nghe nghe.

Conte chhuah hnuah Moses hian inkhelhna hmun a chang hleithei lo zui lehnghala, Chelsea hian loan-a chhuah tirin hralh dan kawng an dapa, Inter hian Chelsea duhthusam an thlen thei dawn niin a lang mek.

Inter hian sawi lan tawh angin Young an lalut tawha, an manager Conte chuan Young hi left wing back ah a hman a rinawma, Moses hi a khelh thiamna sa right wing back lamah a khelh tir a rinawm.

Inter hian tun thlasik bazar chhung Chelsea striker Olivier Giroud pawh an lalut leh lovang tih a sawi theih loha, Tottenham playmaker Christian Eriksen pawh lakluh an tum mek nin chanchinbu mite chuan an tarlang bawk a ni.