Italian club hian squad thawmthat an rilruk a, hemi atan hian an player thenkhat chhuahtir mai an pawi tilo. 2021-22 season khan an hmelma AC Milan ngam loin Serie A-ah pahnihna an ni a, season zo taah pawh khan Napoli an pha lo hle.

An huntawn mek hi siamthat tumin hma an la tan a, an lakluh tum leh chhuahtir tumte pawh an tifel tawh niin an sawi. In puchhuak thei zingah hian Martinez a tel a, tlawm taka an kaltir erawh a rinawm loh.

A tlem berah €70m vel an chhiar dawn niin Gazzetta dello Sport chuan an ziak a, an phut zata lei ngam an awm chuan an hralh mai a rinawm. Martinez hian Serie A season liamtaah khan game 38 khelin goal 21 a khung a, a thiante tih goal tur vawi ruk a siamsak bawk.

Chhuak tur anga thawm a neih rual hian Manchester United leh Barcelona hming a ri nghal a, striker mamawh an nih avangin an dawr lo ang tih a sawi theihloh. Lamrik zingah Real Madrid leh Arsenal-te pawh an tel a, player chhia anih loh avangin duhtu a nei nual ang.

Inter hian 2018 Vawkhniahzawn thla khan an lei a, hemi hma hian Real Madrid-in dawr mahse an hlawhtling lo. Italian club hi Serie A-a vawi khat a champion pui tawh a, Coppa Italia leh Italian Super Cup tum hnih ve ve an chawi tawh bawk. 2022 World Cup-ah khan telin Argentina a champion pui a, Albicelestes tan hian game 54 khelin goal 21 a khung tawh a ni.