Inter Milan chuan nipui bazar inhawn hunah, an striker Lautaro Martinez chu sum tuak nan an hralh phal niin Football Insider chuan a tarlang.

Inter hian an squad thawm that an mamawh avangin, player hralh then a, position thenkhata inlak that an tum niin a lang a, Martinez hi hralh phal mah se, a man an chhiar tlem lovang tih a rinawm.

Argentine striker manah hian Inter hian pound maktaduai 70 vel an duh niin chanchinbu mite chuan an tarlang a, Inter-in Martinez an hralh phal chungchang hian European club lian te beng a verh hle nia tarlan a ni.

Manchester United pawhin Martinez hi an duh nia sawi a ni a, United hian Tottenham striker Harry Kane an la thei lo a nih chuan kum 25 mi Martinez-a lam hi hawi an tum niin chanchinbu mite chuan an ziak.

United hian Kane hi lakluh an tum ber dawn a, mahse Tottenham hian kum 29 mi manah hian pound maktaduai 100 tal an duh. United hian position danga inthawmthat an ngaih bawk avangin Kane-a man hi an ngam lo maithei a, Martinez-a lam hi an hawi chhunzawm lovang tih a sawi theih loh.

Martinez hian season kal mekah Inter tan hian competition hrang hrangah game 47 khel tawhin, goal 21 a thun tawh a, Real Madrid leh Arsenal te pawhin Martinez hi an ngaihven nia sawi a ni bawk a ni.