Serie A lam pawh a ‘hot’ chho zela, tunah hian khelh 15 khelh ni tawhin Antonio Conte-a kaihhruai Inter Milan chu hmahhruaitu an ni a, champion lai Juventus chu pahnihnaah awmin, pathumnaah Lazio an awma, Genoa chu palinaah an awm bawk.

Serie A-ah hian rorel lai pakhat an awm a, 2011-12 season atang khan Juventus bak la champion leh lovin, a zawnin vawi 8 ngawt an champion tawha, tumahin an rorelna an tihtawp sak thei meuh lo.

Tun nipui khan Inter Milan chuan manager thar an ruaia, Juventus hlawhtling taka lo enkawl tawhin Conte an lalut. Conte hnuaiah Inter hian season bul an tan tha hle a, season tir lamah hma hruaiin Juventus chuan rawn lehpel zuai mahse tunah Inter bawk hi hmahruaitu an ni leh tawh.

Inter hi tun season kal mekah vawi khat tlawm tawhin vawi hnih an tumpuite an inhnehtawkpui tawh bawka, vawi 12 hnehna chang tawhin khelh 15 atangin point 38 an hlawhchhuak tawh. Juventus hian khelh 15-ah point 36 hlawhchhuak tawhin, vawi khat an tlawm bakah vawi thum an tumpuite an inhnehtawkpui tawha, vawi 11 an chak tawh bawk.

Inter leh Juventus inkar point hnih a awm a, pathumna Lazio chuan point 33 neiin palinaa awm Genoa chuan point 29 an nei bawka, panganaah AS Roma awmin, anni hian point 29 tho an nei mek.

Mi tam tak chuan Juventus bawk hi champion turin ruat mahse Inter hi an khawng zeka, an manager Conte hi league-a champion thang a ni bawk nen Serie A-ah kum riat hnuah champion thar kan hmu lovang tih a sawi theih hauh loh a ni.