Inter Milan chuan Tottenham atangin midfielder Christian Eriksen chu tun transfer window-ah an la lut dawn ta nge nge niin a langa, a man tur leh a hlawh zat tur thlengin Sky Italia chuan a tarlang.

Sky Italia tarlan danin Eriksen hian Inter-ah pound 320,000 a hlawh dawna, a manah Inter hian pound maktaduai 16.8 an seng dawn niin a tarlang bawk.

Danish midfielder hian Tottenham-ah tun season zawh rualin a contract a hmang zo dawna, Spurs hian contract thar ziahpui duh mahse Eriksen hian chhuah ngei a tum avangin Spurs chuan nipuia a thlawna chhuah tir aiin a manah pound maktaduai 17 vel an hmu dawn niin a lang.

Inter hian tun thla chhungin player pahnih an la lut tawha, Manchester United atangin Ashley Young an lak luh bakah Chelsea atangin Victor Moses an la lut tawh bawka, Antonio Conte hnuaiah Juventus rorelna tih tawp ngei an tum hle.

Eriksen hian Inter-ah kum li leh a chanve daih contract a ziak dawn nia tarlan niin, English chanchinbu te chuan club hnihte inkarah inremna a la awm loh thu an tarlan laiin Italy lama chanchinbu mite chuan club hnihte hi an inrem titih tawh niin an sawi ve mek bawk.

Tun season-ah Eriksen hian Spurs tan game 28 a khel tawha, goal thum khung tawhin assist pathum a nei tawha, Spurs hian Eriksen a hmunruak luah tur hian Benfica atangin Gedson Fernandes chu tun thla khan an lo la lut fel tawh a ni.