15 Mar 2019 06:19

inkhel

Inter District Sub Junior Football Champion Aizawl

MFA Inter District 14th Sub Junior Football Championship final chu March 15, Zirtawpni khan Serchhip Sport Complex-ah final khelh a ni a, Aizawl DFA chuan 2-1 Lunglei DFA hnehin an champion.

Best player-ah Lalrinchhana Aizawl chu thlan a ni a, Top scorer-ah goal ruk khungtu Remruatkima, Kolasib chu thlan ni ve bawk.

02:00 PM Lunglei DFA 1-2 Aizawl DFA

(F. Lalbiakhlua 14') (Lalhmunmawia 57'(P)

Zonunpuia 59')

Goal lut te hi first half leh second half-a lut an ni, Aizawl tan Lalhmunmawia leh Zonunpuia chuan goal khat ve ve an khung a, Lunglei tan F Lalbiakhlua chuan goal khat a khung ve bawk.

Inkhel tan a ni a, team pahnih te an innawr tawn zak zak hnuah Lunglei chuan an hun tha neih hmang tangkai hmasa zawkin minute 14-ah F. Lalbiakhlua chuan an hmahruaina a khung chu Aizawl chuan first half huntawp thlengin an sut thei lo.

Second half-ah Aizawl insiam tha in inkhel an thunun zawk a, minute 57-ah penalian hlawh chhuak hlauh Lalhmunmawia rawn pen chhuakin an siphurh a rawn sut ta a ni.

Aizawl chuan nawr chhunzawmin minute 59-ah Zonunpuia chuan an goal hnihna a khung zui nghal a, Lunglei chuan an siphurh hi huntawp thlengin an sut thei tawh lo a, Aizawl chuan 2-1 in hnehna an chang ta a ni.