Inter Milan chuan Atletico Madrid atangin Brazilian centre-back Joao Miranda an lalut fel a, €12.5m vel an seng niin tarlan a ni.

Copa America atanga Brazil an tlak hnuin Miranda hian Chile atangin Milan khawpui a pan nghal a, Thawhlehni khan medical test a nei.

Kum 30 mi ni mek Miranda chuan, "Inter player ka ni ta tih ka tarlang thei hi ka lawm takzet. Milan-ah tha taka minlo lawm avangin club leh fans-te chungah lawm thu ka sawi a, theihtawp ka chhuah ang." tiin Twitter-ah a post.

Spain-a a awm chhungin Atletico Madrid hi La Liga, Copa del Rey, UEFA Super Cup leh Europa League-ahte vawikhat theuh a champion pui a, kum 2011 July thla khan Sao Paulo atangin a zawm.

2013-14 season khan a khel tha hle a, Atletico hi La Liga-ah champion puiin Champions League final a luhpui bawk a nikum nipui transfer hunlai khan Manchester United leh Manchester City-te nen pawh sawizawm hman an ni.

Miranda hian Brazil national team tan pawh game 21 a khel tawh a, ram tan a game hmasa ber chu kum 2009 April thla khan 2010 FIFA World Cup qualifying round-a Peru an hmachhawn tumin a khel a, kum 2009 khan Confederations Cup-ah Brazil hi a champion pui.

A club thar tur Inter Milan hi season liamta khan an che tha lo va, hei vang hian tun nipui transfer chhungin an tang a kar hmasa khan Monaco atangin French midfielder Geoffrey Kondogbia an lo lalut tawh bawk a ni.