Suzuki Gixxer 250 20th Inter Branch YMA Football Tournament Round of 16 chu July ni 10, Nilainiah AR Lammualah khelh chhunzawm a ni a, inkhel vawihnih awmin Armed Veng leh Salem Veng chuan an khingpui ve ve hnehin quarterfinal final an lut. July ni 12, Zirtawpniah khelh chhunzawm leh a ni ang a, chawhnu dar 12:00-ah Tuithiang leh Durtlang an in hmachhawn ang a, dar 2:00-ah Chanmari leh Khawzawl Joint an in hmachhawn ang.

Quarterfinal lut tawh te:

1. Republic Veng

2. Hnahthial Joint

3. Armed Veng

4. Salem Veng

12:00 PM Armed Veng 7-2 Zawlnuam Borai

(Lalbiakhlua 5', Lalawmpuia Hnamte 11', 12' Lalmuanzova 17', R Lalawmpuia 29', (OG) Lalfakzuala 31', 74') (Lalhmingchhuanga 54', Vanlalhruaitluanga 90+2')

Inkhel hmasa zawk Armed Veng chuan 7-2 a Zawlnuam Borai hnehin quarterfinal an lut. Armed Veng tan Lalawmpuia Hnamte (Optea) leh Lalfakzuala chuan Goal hnih ve ve an khung a, Lalbiakhlua leh Lalmuanzova chuan goal khat ve ve khungin R Lalawmpuia chuan an lamah a ti goal bawk. Zawlnuam Borai tan Lalhmingchhuanga leh Vanlalhruaitluanga chuan goal khat ve ve an khung.

Inkhel tan atangin Armed Veng chuan inkhel an thunun nghal a, minute 13 chhungin Armed Veng chuan goal thum an khung hman; Goal hmasa ber hi minute 5-a lut a ni a, mual veilam sir atangin Lalbiakhlua chuan a khung. Lalawmpuia Hnamte (Optea) chuan an goal hnih a khung zui nghal zat bawk. Lalmuanzova, Lalfakzual chuan goal khat ve ve an khung belh bakah Zawlnuam Borai defender R Lalawmpuia chuan an lamah a ti goal hlauh a, chawlhlawk anih meuh chuan Armed Veng chuan 6-0 in hmaanhruai zui ta a ni.

Second half-ah Zawlnuam Borai chuan counter attack-in an nawr a, Lalhmingchhuanga chuan an siphurh sut then mahse, Armed Veng tan Lalfakzuala chuan goal a khung belh leh a, 7-1 in Armed Veng chuan hmaanhrui zui leh ta a ni. Goal luh belh tawh lo in Armed Veng chuan 7-1 in hnehna an chang tawh dawn emaw tih hnu huntawp dawn added time-ah Zawlnuam Borai tan Vanlalhruaitluanga chuan an goal hnihna khung bawk mahse, hun atawp zui a, Armed Veng chuan 7-2 in hnehna an chang ta a ni.

02:00 PM Salem 2-2 Phulpui

(David Lalchhuanawma 33', 79') (R Laltanpuia 27', RK Rosiamliana 89')

(Penalty Shootout-ah Salem Veng 5-4 in an chak)

Inkhel hnuhnungah Salem Veng leh Phulpui te hunpangngaiah 2-2 a an inhneh tawk hnuah penalty Shootout-in chak zawk zawn a ni a, Salem Veng chuan 5-4 a hnehna changin quarterfinal an lut ta a ni.

Inkhel tan a ni a, team pahnih te an intluk tawk hle a, Phulpui chuan an huntha neih hmang tangkai hmasa zawkin minute 27-ah R Laltanpuia chuan freekick atangin an hmahruaina goal khung mahse, Salem Veng tan minute 33-ah David Lalchhuanawma chuan penalty hmangin an siphurh a rul. Goal dang luh belh lo in 1-1 in chawlhlawk an hmang.

Second half-ah pawh chungnung zawk an awm lo a, team pahnih te an innawr tawn zak zak hnuah Salem Veng chuan an hun tha neih hmang tangkai hmasa zawkin minute 79-ah David Lalchhuanawma bawk chuan box pawn chiah atangin an goal hnihna a khung. Salem Veng chuan 2-1 in hnehna an chang tawh dawn emaw tih hnu huntawp dawn minute 1 ala awmin Phulpui tan RK Rosiamliana chuan an siphurh a sut a, 2-2 a inhneh tawkin hunpangngai an hmang zo ta a ni.

Penalty Shootout-in chak zawk zawn a ni a, Phulpui lam atanga pet J Lianzuala leh Lalrintluanga chuan an pet goal lo a, Salem Veng lam atanga pet HK Lalhruaitluanga chiahin a pet goal lo thung a, Salem Veng chuan 5-4 in hnehna an chang ta a ni.

July ni 12, Zirtawpni Fixtures

12:00 PM Tuithiang vs Durtlang

02:00 PM Chanmari vs Khawzawl Joint

July ni 13, Inrinni Fixtures

12:00 PM Bethlehem Vengthlang vs Bawngkawn

02:00 PM Ramhlun North vs ITI Veng

(adsbygoogle = window.adsbygoogle || []).push({});