Inter Milan chuan an manager thar atan Chelsea leh Juventus manager hlui Antonio Conte chu an ruai ngei dawn niin a langa, Conte-a player duhzawng an rim tan ni pawhin a lang.

Inter hian Conte an lak fel velah Manchester United striker Romelu Lukaku leh Chelsea player tuna Turkish club Fenerbahce tana khel mek Victor Moses-te chu lakluh an tum dawn niin Sky Sports chuan a tarlang.

Tunah hian Serie A lamah khelh khat a la awm a, Serie A season kal mek hi a zawh rualin Inter chuan an manager Luciano Spalletti chu an ban nghal deuh mai dawn niin a langa, Conte hi an be fel vek tawha ngaih a ni.

Kum 2017 nipui bazar lai khan Conte chuan Chelsea-ah Lukaku hi Everton atangin lakluh a lo tum tawh a, mahse Lukaku hian Manchester United a zawm ta zawk. Conte hian striker tharum ngah a ngaisang a, hemi a vang hian Lukaku pawh hi a duh a nih hmel.

Lukaku hian United tan game 96 khel tawhin goal 42 a khung tawh a, mahse a game hnuhnung pariatah goal khat pawh a la khung lo. Lukaku hian thla hmasa lawk khan Serie A lama khelh chu a ‘dream’ a nih thu a lo sawi zauh tawh a, Inter hian an lakluh theih mai pawh a rinawm viau.

Conte hian Chelsea-a a awm laiin Moses a chhawr rim em em a, a season hmasa bera Premier League title an lakna kawngah pawh Moses hi Conte-a player hman rim ber zinga mi a ni. Moses hi winger ni mahse Conte hnuaiah wing-back angin a khel a, a khel chhe ngai lo hle. Mahse Chelsea-in manager thar an neih hnuah Moses a khel tawh ngai meuh lova, loan-a chhuah tir a ni zui ta bawk a ni.