Paris Saint-Germain chu Champions League atanga nek chhuah an ni deuh chiah a, Europe khawmualpui lamah title la thei rih lo mahse tun hnaiah Instagram lamah champion an ni tih an puang.

UEFA Champions League last 16-ah PSG hian Manchester United an hmachhawn a, Paris khawpuiah mikhual club United chu 3-1 ngawtin an chak a, hei vang hian Europe khawmualpui inelna lian bera PSG zinkawng chu a tawp phah a. Last 16-ah hian a zawnin kum thum chu an chak thei tawh lo a ni.

Qatar sumdawng hausa Nasser Al Khelaifi club PSG chuan an tum ram thleng thei ta chiah lo mahse tun hnaiah champion nihna pakhat an nei niin an puang a. Social media lamah follower an neih belh zel a, Zirtawpni khan Instagram-ah follower hi 20 million an nei tling tawh a, hei hi PSG chuan chhuang takin an puangzar nghal a ni.

An club chuan thuchhuah an siam a, “Parisian club hian social media lamah nasa takin hma a sawn zel a, tun dinhmunah chuan Instagram lamah follower hi maktaduai 20 chuang zet kan nei ve thei ta a ni,” tiin an tarlang.

Hetianga thuchhuah an siam hi UEFA in an striker Neymar tawng bawlhhlawh lutuk vanga thubuai an awrhtir ni takah a ni a. PSG hian champion niin han insawi hluai mahse, Champions League-a an hneh loh tak Manchester United aiin follower hi an la nei tlem zawk a, United follower hi maktaduai 7 velin an la tam zawk a ni.