LeBron James chuan Los Angeles khawpui a pan chhan chu basketball vang liau liau a nih thu sawiin, Hollywood vang a nih loh thu a sawi.

Vawi 4 ngawt NBA Most Valuable Player lo ni tawh LeBron James hian July thla khan Los Angeles Lakers a zawm a, $154 million (£116 million) man hu vel contract an ziak a. LA a zawm hnuah hian TV leh film project thenkhatah James hi a tel tawh a, hei vang hian min tam tak chuan Hollywood a tinzawn vanga LA pan a nih thu an sawi a ni.

Kum 33-a upa James chuan, “Thutlukna ka siam dawn khan eng dang mah ka ngaihtuah lo a, ka nupui fanaute leh Lakers chiah ka rilruah ka dah a ni,” a ti.

A sawi zelnaah, “Basketball player ka ni a, ka inkhel thin a. Chu lo chu eng dang mah ka ti ngai lo a. Sum lakluhna chungchangah chuan helai hmun ka pan hma daih tawh khan pangngai takin a lut tawh a, tuna ngaihtuah thar hi a ngai tawh lem lo,” a ti bawk.

James hian SpringHill Entertainment production company a nei a, anni hian project hrang hrang an nei nual a. Space Jam movie an tih thar turah James hi chang ve turin an ti nghe nghe a ni.

LeBron James hian Cleveland Cavaliers chu vawi 8 ngawt mai a zawnin NBA finals a thlenpui a, season liam ta tawp rualin a chhuahsan zui a. Tuna a team zawm thar LA Lakers hian NBA finals an thlen hnuhnun ber chu 2010 daih tawh khan a ni.

LA Lakers a luhchilh takah chuan fans tam takin beiseina an nei sang nghal hle mai a, mahse James chuan champion lai Golden State Warriors te rualpuia awm thei tur chuan hun an la duh tur thu a sawi.

“Golden State te awmna anga awm thei tur chuan kawng thui tak kan zawh hmasak phawt a ngai dawn a. Thawhrimna nen a pen khat te tein kan kal chho ang a, kan hmabak neih ang ang te hi tha taka hlen chhuah tum zel phawt ila, nakinah chuan Golden State in an lo puitlin theih tawh hi kan la ti ve thei mai ang,” a ti.