Pathianni zan dar 9:15-ah Liverpool leh Manchester City an inhmachhawn dawn, Anfield-a match hi a pawimawh dawn khawp mai.

Liverpool hi league hmahruaitu an ni mek a, khelh 27 atangin point 63 an nei. Manchester City chu pahnihna niin, Liverpool nena an inkar chu point 1 chiah a ni.

Ngenna : Website advertisement min click sak ve thin turin kan ngen a che u.

Team tha pahnih an inhmachhawn dawn, an manager pahnih te pawh an inzah tawn ve ve. Reds hian hnehna an chang a nih chuan point 4-in City an tlansan ang a, Arsenal tan pawh champion lai khum theihna chance a tha dawn bawk.

Zirtawpni tlai khan pre-match press conference neih a ni a, Liverpool boss Jurgen Klopp chuan, "Erling Haaland-a che vel in hmu thin ang a, a fin zia in hria ang.

"Defender tha tak tak a lo hmachhawn teuh tawh, a fingin defender hmachhawn thiam ber zinga mi a ni ngei ang.

"Man City kan hmachhawn chuan kan defending a that a ngai. Vigil van Dijk hian Haaland lo veng tha em em pawh nise, Phil Foden a la awm a, ani hian pen 30 vel atang pawhin goal a khung thei.

"Rodri pawh khawi hmun atang pawhin a rawn lawr zawk zawk thei bawk a, Haaland chiah ven chu thil tihchi a ni dawn lo. Tin, set-piece ah Manuel Akanji te an la nei zel bawk nen.

"Kan inhmachhawn tur hi ka phur tawh hle, keini pawh kan tha tawk a, anni pawh an tha tawk hle bawk, inkhel tawh ila a ni mai alawm," tiin a sawi.

Manchester City manager Pep Guardiola chuan, "Liverpool hian game tactic chi hrang hrang an khel thei, a chang chuan mak danglam takin an khingpui te an hmachhawn thei, mahse an khelhphung tak tak erawh a danglam tam em em ngai chuang lo.

"An game a rang a, tlan chak tak tak an nei bawk. Team tha tak niin game hmuhnawm tak an khel thei. Bayern Munich ka enkawl laia Dortmund khelh dan nen khan a inang deuh hian ka hre thin," tiin a sawi ve bawk.