10 Jun 2020 09:37

bakteaJr.

Mizo tlangval

​Inhnek turin AJ leh Tyson Fury an inrem

Boxing heavyweight division lama title awm zawng zawng kawltu te pahnih Anthony Joshua leh Tyson Fury te chu inhnek turin an inrem thu boxing promotor Eddie Hearn chuan a sawi.

Kum 30 AJ hi WBA, IBF leh WBO world heavyweight champion a ni meka, kum 31 mi Fury hi WBC world heavyweight champion ni mek bawkin, an pahnih hian undisputed champion zawng turin an inhnek ngei dawnin a lang.

British boxer pahnih AJ leh Fury-te chungchangah hian May thla atang khan inbiakna kalpui tawh a ni a, AJ-a promoter Eddie Hearn chuan a thuphung chuan vawi hnih inhnek turin inremna an neih tawh thu Sky Sports a hrilh.

Hearn chuan, “Sum lamah chuan Joshua leh Fury te chungchangah hian inremna chu kan nei tawh a ni bera, kan dinhmun a tha a, a thuphung chuan kan inrem tawh a tih theih a, vawi hnih inhnek turin inremna a awm tawh a ni,” a ti.

Joshua hian nikum khan Andy Ruiz hnehin, a title a la kir leh a, tunah hian mandatory challenger hmachhawn tur a nei a, Bulgarian boxer Kubrat Pulev nen kumin hian an inhnek ngei a rinawm.

Fury hian kumin khan Deontay Wilder hnehin, WBC title a hlawhchhuaka, ani pawh hian contract an lo ziah tawh sa angin Wilder hi a hmachhawn ve leh phawt a ngai a ni.