Inhnek chawlhsan ka rilruk: Amir Khan

03rd April 2020, 10:04PM

Amir Khan chuan coronavirus vanga buai mek karah inhnek chawlhsan tawh mai a rilruk thu a sawi chhuak.

Light-welterweight champion hlui Amir Khan hian a rei thei ang ber inhnek zel chu a duhthusam a nih thin thu sawiin, tunah erawh chawlh tawh mai hi a duh tan niin a sawi a ni.

Kum 33-a upa Khan hi nikum July thlaah khan Australian boxer Billy Dib nen Saudi Arabia-ah an inhnek a, coronavirus darh mek vangin boxing ring chhunga a kir leh hun tur a sawi chian theih loh a, hetiang a nih avang hian chawlh hlen tawh mai chungchang hi a ngaihtuah phah a ni.

Khan chuan, “Ka inhnek leh ang em? He zawhna hi ka chhang thei lo a. Tunah tak phei chuan ka rilru hi a phir hle a, ka la inhnek zui zel dawn em tih hi ka ngaihtuah ve nasa a ni,” a ti.

“Pawisa lampangah chuan harsatna ka nei lo turah ka ngai a, ka dinhmun hi a ziaawm pha ve chuan ka hria a. Vawi khat chiah inhnek leh kher hi ka tan a tul ber em? Ka hming thang mawi mek hi a mawi loh phah ang em tih thlengin ka ngaihtuah a. A chhanna mumal tak erawh ka la ngaihtuah chhuak lo,” a ti bawk.

A sawi zelnaah, “Ka la inhnek zui zel dawn nge chawlh ka puang tawh dawn tih chungchangah hian keimah leh keimah ka inzawt a, ka inhnial deuh reng mai,” a ti.

“Boxing ka ngainatna hi a la reh lo a, nuam ka la ti em em reng a. Chutih rualin camp hautak deuh neih hnuah eng rilru nge ka put ang tih chu a sawi theih loh a, ka rilru put dan hi a inthlak danglam vek thei ve tho a ni,” tiin Amir Khan chuan a sawi.

UK a coronavirus dona kawnga hma an lakna turin Amir Khan hian in chhawng li, 60,000 sq. ft. chu thawktute hman atan a thawh a ni.

Copyright © inkhel.com 2024. All rights reserved.