Vasyl Lomachenko chuan kum 40 tlin hnua boxing khelh zui zel ai chuan ramvah emaw, nghakuai chiah vel mai mai emaw chu a thlan zawk thu a sawi chhuak.
Kum 31-a upa Vasyl Lomachenko chuan WBA lightweight title leh WBO lightweight title te a kawl mek a. Tun kar Inrinniah hian London khawpuiah British boxer Luke Campbell nen an inhnek dawn a, WBC title pawh kawl tel theih a inbeisei hle.
Lomachenko hian 2008 kumah khan featherweight category-ah Olympic gold medal a la a, 2012 Olympic ah pawh lightweight category-ah gold medal a la bawk a. A vanglaiin bout 396 a inhnek tawh a, hengah hian vawi khat chiah chak loh a la nei niin an sawi.
Ukrainian boxer Lomachenko hian kum 40 a tlin hmaa inhnek chawlhsan a rilruk thu a sawi chhuak tawh a. Manny Pacquiao anga kum 40 pelh tawh hnuah pawh la inhnek zui zel chu a tum loh thu a sawi.
Kumin July thlaah khan kum 40-a upa Manny Pacquiao chuan American boxer Keith Thurman chu split decision-in a hneh a, welterweight world champion ni thei upa ber a ni a. Lomachenko chuan hetiang hi chu tih ve a tum loh thu a sawi chhuak a ni.
“Kum 40 tlin tawh hnua la inhnek zel chu ka tum lo a, ka duh lo hrim hrim a. Kei chuan a uar thlak mah mah niin ka ngai,” tiin Lomachenko chuan a sawi.
“Kum 4 ka nih atangin training ka nei tan a, boxer tur hrim hrima piang hi ka nia. Thil eng pawh hian tawp hun a nei tur a ni a, ka boxing khelh pawh duhtawk hun ka neih a ngai a. Ramvah te ka duh a, nitin nghakuai chiah te ka chak bawk a. Nitin training neih reng chu ka duh reng dawn lo,” a ti bawk.
A sawi zelnaah, “Ka thil tum ber, ka tinzawn ber leh ka duhthusam ber chu lightweight title pali lak theih a ni a. Ka thil tih tum ber hi ka tihlawhtling thei a nih chuan engtin nge ka awm zel dawn tih hi ka sawi thei lo. Tunah chuan title dang pahnih lak a la ngai a ni,” a ti.
London Olympics 2012 ah khan Luke Campbell chuan Vasyl Lomachenko tih ang a puitlin ve bawk a, bantamweight division-ah gold medal a la a. Kumin April thlaah khan Lomachenko hian Campbell-a chipui Anthony Crolla chu fourth round-ah a knock-out a, Luke chuan a aia chet that ngei a tum dawn a ni.
Lomachenko hian world title pali kawl thei tur chuan Inrinniah Campbell a hneh phawt a ngai dawn a, hemi hnuah hian IBF title kawltu, Ghana boxer Richard Commey chu a hneh ve leh a ngai dawn a ni.