Alexis Sanchez chuan an club training naah a tihrawl a tina a, hun rei tak a inkhelh theih loh hmel a. Sanchez hi kumin chhung chuan a inkhel thei dawn lo chiang a, tuna a lan dan chuan match 11 vel chu a chawlh a ngaih hmel hle.
Nilaithawhtan khan Alexis Sanchez hi a inhliam a, a intihnat dan hi chiang taka sawi ni chiah lo mahse a tihrawl a tikhawlo niin an sawi a. Inhliam vanga kar thum chhung chawl tawh Victor Lindelof aiin a chawl rei zawk dawn niin an sawi a, heti a nih chuan kuminah chuan a inlan thei tawh dawn lo chiang a ni.
Jose Mourinho chuan khawl hmanga en fiah a la nih loh thu sawiin, Sanchez chu professional a ni a, a hliam nat dan chu a hre chiang a, hun rei tak a duh dawn tih a hriat nghal niin a sawi.
Mourinho chuan, “Ka lo tawn hriat tawh atang pawhin a inhliam dan leh na a tih vanga a te chhuah dan atang khan a namai lo tih a chiang a. A lan danah chuan hun rei deuh zawk chu a inhliam vang hian a chawlh ngei a ngai dawn a ni,” a ti.
“Ka hmuh dan chuan a hliam hi a na thawkhat hle dawn a, kar khat emaw, ni 10 chhung emaw chauh chawl tur tih ang chi kha chu a nih loh hmel hle a. Victor Lindelof hliam nen chuan a inang miah lo a, Alexis hliam hi a nat hmel zawk daih a, hei vang hian chawlh pawh a chawl rei zawk dawn niin a lang,” a ti bawk.
Tuna an rin dan chuan a hnuai tarlan hoah hian Alexis Sanchez chu a tel ve thei hlawm dawn lo a ni.
Dec 1: Southampton (A)
Dec 5: Arsenal (H)
Dec 8: Fulham (H)
Dec 12: Valencia (A) (Champ League)
Dec 16: Liverpool (A)
Dec 22: Cardiff City (A)
Dec 26: Huddersfield Town (H)
Dec 30: Bournemouth (H)
Jan 2: Newcastle United (A)
Jan 5: FA Cup third round
Jan 13: Tottenham Hotspur (A)