Berlin-ah Barcelona chuan 3-1 in Juventus an hneh, Liverpool-in European Cup an lak zat Barca chuan vawi 5 an la ve ta chiah. Heta tang hian Liverpool hi club ropui an nih zia a lang chiang hle.

Mahse vawiinah chuan champion hmel an hmu hleithei ta lo, khawnge trophy ? Khawnge Premiership title ? 2005 khan Champions League title an la, kha kha Trophy lian an lak hnuhnung ber a ni ta. Premier League neih a nih hnuah phei chuan Liverpool hi English top flight league-ah an la champion leh lo a ni.

2012 khan English coach Brendan Rodgers chu Liverpool chuan an chhawr tan a, a tir atangin Rogers chungah Liverpool fans ten rinna an nghat nghal. A game khelhpui dante en phei chuan Liverpool game chu English club zingah a hmuhnawm ber an ni chho. English player a ngaina a, team ropui tak din tumin theih tawp a chhuah.

Mahse khawnge trophy ?

2012 June thla atang khan Liverpool a enkawl tan, 2015 June thla a thleng ta, khawnge Premier League leh Champions League trophy chu ?

Premier League-a an champion teuh ber tum chu 2013-14 season kha niin, ropui takin Suarez-a hovin season tha tak an hmang, mahse a tawp dawnah an tawlhthlu palh hlauh mai. Suarez chuan Barcelona a pan san a, 2014-15 season-ah phei chuan top 4-ah pawh an lang phak tawh lo, Europa League khel turin season thar an nghak mek a nih hi.

Suarez man kha an hmang tangkai em ?

Liverpool tana Suarez thawh hlawk zia kan hria, sawi nawn vak a ngai tawh awm love. Barcelona sawmna a hnar zo lo, champion chakin Liverpool a chhuahsan ta a, Barcelona Treble champion a nih pui. Suarez khan Liverpool kha champion thei niin a hmuh loh vangin a chhuahsan ti ila kan sawi sual lovang.

Barcelona chuan Suarez manah £65 million lai Liverpool an pe, thenkhat chuan Uruguay striker manah £75 million lai Barca hian an pe te an ti, hei erawh khawvelin a hrechiang lo.

Suarez hralhna man leh tlem belhin Brendan Rodgers chuan Rickie Lambert (£4m), Adam Lallana (£25m), Emre Can (£10m), Markovic (£20m), Lovren (£20m, Origi (£10m), Moreno (£12m) leh Balotelli (£16m) te a lei khawm. Heng player man belhkhawm chu £117m lai a ni hem mai.

Brendan hian heng player a lakkhawm tam zawkte hi la naupang takte an ni a, player naupang tak nen team din a tum. He a policy hi a tha, mahse Liverpool hian an elpuite an en a ngai, Chelsea, Arsenal, Man City leh Man Utd ten player lar an lei nawk laiin Brendan erawh chuan player naupang la tha tur a khawm.

Nakina tha tur ni mahse an that tak tak hunah a chang leh tawh dawn lo niin a lang, Sterling pawhin chhuah a tum reng niin a lang. Chuvang chuan Brendan hian trophy pakhat tal lakpui thei tur emaw, champions league khelh theihna khawp player lar hi a mamawh niin a lang.

Danny Ings hi a chhe hran lo.

Kum 22 mi Burnley striker hian a contract a hmang zo, free transfer-in Liverpool a zawm ta, hetih lai hian kum 24 hnuailam a la nih avangin Liverpool chuan Burnley hnenah pawisa tlem chu an pek a ngai dawn.

Season liamta khan game 35 atangin Ings hian goal 11 a khung thei a, hei hi Liverpool striker te goal khung zat aiin a tam daih a ni. Ings hi striker tha ve tak a ni tih chu kan chiang, goal a khung thei a, Burnley tan chuan a tangkai tak zet, mahse Liverpool innghahna a ni thei angem ? Tih hi zawhna lian tak a ni.

English a ni a, kum 22 mi lek a la ni zui bawk. Nakin lawka England striker tha tak pawh a la ni thei ang, mahse tun dinhmunah chuan Champion emaw Top 4 emaw dinhmuna Liverpool hlangkai tur chuan ka la ring ngam chiah lo deuh a ni.

Liverpool hian striker tha Sturridge an nei a, ani hi a inhliam hrat em em, chuvang chuan season tluanin a rinngam angem ? Divock Origi hian loan-a a khelhna Lille atangin Merseyside a pan leh tawh dawn niin a lang. Heng striker pathumte hian Liverpool an champion pui thei angem ? Top 4-ah Liverpool an thlenpui thei angem ? Striker tha tak, World Class striker tha tak an mamawh niin ka hria.

A changa che tha, a chang che tha lo striker hi champion-na khawp an ni lo. Class nei tha, khelh chhiat chang pawha goal khung thei Liverpool hian an mamawh khawp mai. Season liamta te pawh khan Liverpool khel hi ka enkim thawkhat, game an thunun em em lai leh an bawh nat em em laitea goal an khung theih loh a tam mai. Game-a hneh em em chunga an chak loh chang pawh a awm teuh bawk. Hei vang hian Liverpool hian World Class striker an mamawh hle niin ka hria.

Gerrard a hun taka a chhuak, Milner a fuh ka ring.

Liverpool tana a tangkai zia leh a thawh hlawk zia kan hria, mahse tunah chuan kum 35 mi a lo ni ve ta a, a hun takah Gerrard hian Liverpool a chhuahsan niin ka hria. Player naupang zawkte a kian ni berin a lang a, Captain a ni a, a la fit pangai tho, mahse champion tura a team kaihruai tur chuan a tha a thum ve ta a ni.

Brendan chuan kum 29 mi James Milner chu Manchester City atangin a lalut a, Milner hian regular taka khelh a duh avangin Liverpool hi a zawm ta a ni. Pellegrini chuan Man City midfield ti chak turin la duh hle mahse Milner hian chhuah a thlang ta zawk hi thutlukna dik tak niin ka ngai.

English midfielder-ah chuan ka duh ber pawl a ni a, tawn hriat a ngah tawh a, a work rate a that bakah a game a physical thei em em bawk. Brendan hian Henderson, Lazar Markovićc, Jordon Ibe, Raheem Sterling, Adam Lallana leh Philippe Coutinho-te nen a midfield a rem fuh a nih ngat chuan Liverpool hi a laiah chuan an khawng thei khawp ang le.