12 Oct 2018 01:35

inkhel

Infiamna tak tak ni lo, hliam tak tak ni si

WWE chu infiamna huanga tel deuh tho si, infiamna tak tak ni si lo, a ngainatute pawhin a tak a ni lo tih hre reng mahse an en loh phah chuang lo a. He infiamna hi a tak tak ni lem lo mahse hliam erawh an nei ve fo thin a. WWE match vanga inhliam nasa zual thenkhat han tarlang ila.

Joey Mercury:
Armageddon 2006 ah inhliam avangin a tel chhunzawm theih loh phah a ni. Joey Mercury chu 4-team ladder match ah a tel a, leihlawn chuan a hnarah a fuh a, a thi nasa hle a. A hnar thi chu a tawp thei mai lo a, damdawi lam mithiamte chuan an buaipui a, hmun eng emaw zatah an thui a, hemi atang hi chuan ngai a awh leh ta lo.

Shawn Michaels:
WWE khawvelah chuan Shawn Michaels tluka che hmuhnawm hi an awm lo ang tih theih a ni a, chanchin a ngah a, boruak a siam thiam hle a. 1998 khan The Undertaker nen an inhmachhawn a, kuang a delhna lamah a hnungzang ruh a tikhawlo a, hei vang hian kum 4 chhung zet chu wrestling a chawlhsan phah a. Darkar 4 zet an zai a, a hnungzang ruh chhe laiah chuan thir an phum ta ringawt a ni.

Stone Cold:
SummerSlam 1997 ah Owen Hart leh ‘Texas Rattlesnake’ Stone Cold te hi an inbei a, Owen Hart hian Intercontinental Championship title a kawl mek a, hei hi an inchuh a. Hart chuan reverse piledriver hmangin Austin chu a bei a, Steve Austin-a lu chuan lei a tauh a, hetia an tihna lamah hian a nghawng ruh chu a tliak ta a. Vawi eng emaw zat an zai a, a nghawng dik lo pawh chu a zia ve leh thei hlauh a. Stone Cold hian a zeng hlen dawn emaw a ti hman hial a, mahse a vannei hle a, thla 3 hnuah a kir leh thei hlauh a ni.

Darren Drozdov:
Darren Drozdov chanchin hi WWE khawvelah chuan hriat nuam lo ber pawla ngaih a ni a, 1999 khan SmackDown-ah Drozdov hian D’Lo Brown chu a hmachhawn a. Brown hian powerbomb a hmang a, hetah hian an chesual a. Brown chuan chhuat huh lai a rap fuh palh a, hei vang hian a tleng zeuh a, Drozdov chu a lu vit zawngin a tla a, a nghawng ruh a tikhawlo nghal a. Drozdov hi a zeng hlen a, a eizawnna a chhunzawm thei ta lo a ni.

Owen Hart:
Over The Edge 1999-ah WWE chanchin sawi tawha mi thin thawng ber mai a thleng a, an inbeih hmaa mi mit la tur leh boruak siam tura ruahmanna an siam angin Owen Hart chu ring chung zawnah hruiin an khai thla a. Hetianga an khai thlak lai hian Owen Hart chu a tla palh ta a, feet 78 zeta sang atangin ring-ah chuan bawkkhup zawngin a tla a, damdawi in an panpui laiin Hart hi a thi zui a ni.