Roger Federer chu infiammi zinga sum la lut hnem ber niin, hmahruaitu lo ni thin Cristiano Ronaldo leh Lionel Messi te chu a khum.

Tennis star Roger Federer chuan chhiah pek hmain $106 million zet chu a hai lut a, Portuguese superstar Cristiano Ronaldo aiin a sum lak luh zat hi $1 million in a tam a, a chungnung ber a nih theih phah a ni.

Forbes chuan infiammi chi hrang hrang sum lak luh dan hi tun hnaiah an puangzar a, kum 30 kal ta atanga hetianga infiammi sum lak luh an puanzar chinah Roger Federer chu tennis player zingah dinhmun sang bera ding thei hmasa ber a ni.

Federer chuan $106 million zet a lak luh lai hian tennis court atanga a lak luh chu a tam lo hle a, fakna leh sponsorship vel atangin $100 million zet a la lut a, Uniqlo, Credit Suisse, Mercedes-Benz leh company dang 10 zette atangin heng hi a la lut a. Inkhelhna atanga a sum lak luh chu $6 million chauh niin an tar lang.

A hmaa pakhatna Cristiano Ronaldo chu pahnihnaah a tla thla a, Lionel Messi chu pathumnaah a awm bawk a. Paris Saint-Germain forward Neymar chu palinaah awmin, a hnuaiah hian NBA player - LeBron James, Stephen Curry leh Kevin Durant te chu an awm bawk a ni.

List chhuak tharah hian NBA player an lang hnem ber a, mi 34 zet an lang phak a, infiamna peng hrang hrangah chuan anni aia lang hnem hi an awm lo a, NFL player chu a hnaih bertu niin, mi 31 an lang a ni.

Golf khelh thiam hmingthang Tiger Woods pawh Top 10 huangah a lang a, 8-na a ni thei a, kum khat chhunga a sum lak luh chu $62.3 million niin, fakna leh sponsorship velah $60 million a la lut a, inkhelhna atanga a lak luh chu $2.3 million a ni.

He list-ah hian professional baseball player pakhat chiah a lang thei a, Los Angeles Dodgers pitcher Clayton Kershaw tih loh chu lang thei an awm ve lo a ni.

Tuna list chhuak thar an puanzarah hian Forbes chuan kum 4 chhunga infiammi te sum lak luh tlakhniam hmasak ber a nih thu an tar lang a, coronavirus vang niin an sawi a. Infiammi sum la lut hnem zual 100 te sum lak luh zawng zawng belh khawm hi $3.6 billion niin, 2019 a an sum lak luh aiin 9% in a hniam zawk a ni.

Hmeichhe tennis player pahnih Naomi Osaka leh Serena Williams te chu Top 100 ah hian an lang a, Naomi Osaka chu 29-na niin, Serena Williams chu 33-na a ni a. 2016 hnua Top 100 huanga hmeichhe tennis player pahnih lan leh theih hmasak ber niin, 2016 kumah khan Serena Williams leh Maria Sharapova te chu an lo lang tawh a ni.