Portugal leh Al Nassr striker Cristiano Ronaldo chu nikum chhunga infiam mi sum lalut hnem ber a ni a, a elpui ber thin Lionel Messi chu pathumna a ni.

Sportico in kum 2023 chhunga infiam mi sum lalut hnem ber an chhutah Ronaldo hi a chungnung ber a, pahnihnaah golfer Jon Rahm a awm.

Nikum January thla khan Ronaldo hian Manchester United a chhuahsan hnuah Saudi Pro League club Al Nassr a zawm a, kum 39 mi hian kum 2023 chhung khan pound maktaduai 218 zet a lalut nia tarlan a ni.

Pahnihna dinhmun hauhtu John Rahm hian nikum chhung khan pound maktaduai 161 a hlawh niin an ziak a, Inter Miami leh Argentina star Messi chuan pound maktaduai 103 a hlawh nia tarlan a ni ve bawk.

Messi dawtah hian NBA player LeBron James a awm a, Lebron hian nikum chhung khan pound maktaduai 99.8 a lalut a, panganaah Paris Saint-Germain leh France player pawimawh Kylian Mbappe awmin, Mbappe hian pound maktaduai 99.2 a lalut.

Nikum chhunga infiam mi sum lalut hnem ber Ronaldo hian Al Nassr-ah hian kum hnih daih contract a ziak a, Al Nassr-ah hian kum khatah pound maktaduai 175 lalutin, sponsorship leh thil dangah pound maktaduai 48 a lalut bawk a ni.