13 Sep 2019 05:13

inkhel

Inelna boruak sang chho zel rawh se: Hamilton

Lewis Hamilton chuan Formula One intlansiak neih chhoh zel turah inelna boruak sang chho zel se a tih thu a sawi.

British driver Lewis Hamilton hian championship-ah hma a hruai fal tan tawh hle a. Mercedes chuan season tan tirh atangin bul an tan fuh chho viau a, hei vang hian Hamilton-a tan pawh title lak chu a huphurhawm loh hmel viau tawh a ni.

Mercedes chu che fuh chho viau mah se, tun hnaiah team dangte chuan an nawr chep sawt ve hle a, hei vang hian an tan inthlahdah theih a ni bik lo hle a. Intlansiak hnuhnung hoah phei chuan Hamilton leh Valtteri Bottas te chu an vannei leh hram thin a ni ber.

Ferrari driver Charles Leclerc chu Belgium leh Italy ah te a chak a, Hamilton chuan Hungary-a an intlansiak tumin Red Bull driver Max Verstappen chu pelin pakhatna a ni hlauh a. Hetiang hian inelna boruak pawh a sang chho viau a, Hamilton chuan hetiang hi ni chho zel thei se a duh thu a sawi a ni.

Hamilton chuan, “Kan intlansiak dawn reng reng hian chak chiang sa angah ka indah ngai lo hrim hrim a. Chutiang zawngin ka rilru sukthlek dan hi ka siam ngai lo a. Theihtawp chhuahin pakhatna nih theih hram tum turin ka rilru ka siam thar ziah thin,” a ti.

“Factory-ah ka kal ang a, a hmaa kan lo tih tawh thin ang chu kan ti leh ang a. Kan car chu a hma aia tha zawk a nih theih nan hma kan la ang a, intlansiak hunah tha taka kan tlan theih kan beisei leh dawn a ni,” a ti bawk.

A sawi zelnaah, “Kan intlansiak leh hunah chuan a hma zawng aia thaa kan tlan theih ka beisei hle a. Kan elpuite nen pawh boruak sang tak hnuaia kan intlansiak theih ka duh a, chutiang a nih theih ngat chuan a lawmawm khawp ang,” a ti.

“Keini team te, Red Bull te leh Ferrari te inkarah boruak sang tak awm zel se, intlansiak harsa leh khirh tak karah inel chho ila. Ka mi mal ngaihdan takah chuan chutiang boruak sang tak karah chuan intlansiak thei zel ila a fuh berin ka hria,” a ti a ni.

Tun season chhungin Mercedes chu tlema tlan muan deuhna circuit-ah Ferrari aiin an che fuh zawk zel a. Red Bull chuan tlan muanna circuit-ah hian hma an sawn chho ve mek bawk a ni.

Singapore Grand Prix chu an intlansiak lehna tur hmasa a ni a, helai hmun hi Mercedes leh Red Bull te tan chuan chet fuh theihna tur niin a ngaih theih a ni.